Bəlağətli çıxışlar edən rejim rəsmiləri HƏMAS, “Hizbullah”ın zəifləməsi, Bəşər Əsədin süqutu ilə gələn məğlubiyyətlə barışmaq istəmir. Müxtəlif bəhanələrlə özlərinə, düşdükləri vəziyyətə haqq qazandırmağa çalışırlar. 

Bu vəziyyət Tehran rejimi daxilində qarşıdurmaya səbəb olub. Hakimiyyətin əsas dayağı sayılan İnqilab Keşikçiləri Qvardiyasında (SEPAH) fikir ayrılığını artırıb.

İngiltərədə çıxan “The Telegraph” qəzeti yazır ki, SEPAH generalları Əsəd rejiminin süqutundan qəzəblənib. İranın bölgədə nüfuzunu itirəcəyinə görə onlar bir-birini günahlandırırlar. Bəşər Əsədin qaçacağını bu komandanın daxilində heç kim zənn etməyib. İran İsraildən qorunmaq və “Hizbullah”la yaxınlığını qorumaq üçün onu hakimiyyətdə saxlamağa çalışıb: “Tehran Əsəd rejimini dəstəkləmək üçün milyardlarla dollar xərcləyib. Suriya Bəşər Əsəd rejimi dövründə İrandan “Hizbullah”a silah təchizatı üçün əsas marşrut olub...

SEPAH daxilində bir sıra rəsmilər “Qüds” qoşunlarının komandanı İsmayıl Kaanini günahlandırır. Çünki o, Əsəd ordusunun dağılmasına imkan verməkdə əsas təqsirkar sayılır. Bunu onun üzünə deməyə heç kim cəsarət etmir, ancaq o, İranın maraqlarının itirilməsinin qarşısını almaq üçün heç bir iş görməyib. İsmayıl Kaani Suriyadakı vəziyyəti yalnız Tehrandan izləməklə kifayətlənib”.