Ukraynanın Ali Radası 312 səslə Yevgeni Xmaranın müdafiə naziri vəzifəsinə təyin edilməsini dəstəkləyib.

Bu barədə “RBK-Ukrayna” xəbər verir.

Bundan əvvəl Xmara hökumətin iyulda yenilənməsindən sonra müdafiə qurumuna nazir səlahiyyətlərini icra edən şəxs kimi rəhbərlik edib.

Xmaranın namizədliyini bir gün əvvəl parlamentə Prezident Volodimir Zelenski təqdim etmişdi.

Prezident Andrey Sıbiqanın xarici işlər naziri və Yevgeni Xmaranın müdafiə naziri təyin edilməsini dəstəklədiklərinə görə deputatlara təşəkkür edib.

"Hər iki nazir üçün tapşırıqlar tamamilə aydındır: Ukraynaya daha çox güc lazımdır. Və o, bunu əldə edəcək", - Zelenski bildirib.

Xmara, öz namizədliyi üzrə səsvermədən əvvəl Ali Radada çıxış edərək, cəbhənin gücləndirilməsini və hərbçilərin operativ şəkildə silahla təmin olunmasının onun işinin əsas prioritetləri olduğunu bildirib.

Digər prioritetlər sırasında o, Rusiya hərbi və strateji obyektlərinə uzaq və orta mənzilli zərbələrin endirilməsini, Ukrayna müdafiə-sənaye kompleksinin inkişafını və silah istehsalının artırılmasını qeyd edib.

Bundan əlavə, o, prezident, parlament, hökumət, Baş Qərargah, Müdafiə Nazirliyi, qoşunlar, silah istehsalçıları və beynəlxalq tərəfdaşlar arasında qarşılıqlı fəaliyyətin gücləndirilməsinin tərəfdarı kimi çıxış edib.

Sibiqa, xarici işlər naziri postuna namizədliyi üzrə səsvermədən əvvəl Ali Radada çıxış edərək, Ukraynanın diplomatik sisteminin əsas məqsədini müharibənin başa çatdırılması olduğunu vurğulayıb.

O qeyd edib ki, Ukrayna müharibənin həlledici mərhələsindədir və bu zaman diplomatiyanın rolu xüsusi əhəmiyyət kəsb edir. Onun sözlərinə görə, ölkənin xarici siyasəti maksimum praqmatizmə və nəticəyə istiqamətlənəcək.

Əsas prioritetlər sırasında o, ədalətli sülhə nail olunmasını, Ukraynanın Avropa İttifaqı və NATO-ya inteqrasiya yolunda irəliləməsini, həmçinin xaricdəki ukraynalılarla əlaqələrin gücləndirilməsini qeyd edib.

Xatırladaq ki, iyulun 16-da Ali Rada yeni təyin olunmuş baş nazir Sergey Koretskinin təqdimatı ilə Ukrayna Nazirlər Kabinetinin yeni tərkibini təsdiqləyib, lakin prezident kvotası üzrə xarici işlər naziri və müdafiə naziri təyin edilməmişdi.

Hökumət iyulun 20-dən Ukraynanın müdafiə naziri səlahiyyətlərinin müvəqqəti icrasını Ukrayna Prezidenti Volodimir Zelenskinin iyulun 17-də ölkənin Təhlükəsizlik Xidmətinin rəhbəri səlahiyyətlərinin müvəqqəti icrasından və oranın "A" Xüsusi Əməliyyatlar Mərkəzinin rəisi vəzifəsindən azad etdiyi Yevgeni Xmaraya həvalə edib.