Müdafiə Nazirliyinin Mərkəzi hərbi həkim komissiyasının sabiq rəisi Rasim Həsənovun cinayət işi üzrə məhkəmə prosesi yekunlaşıb.

Ölkənin yerli saytlarının xəbərinə görə, Bakı Hərbi Məhkəməsində hakim Anar Rzayevin sədrliyi ilə keçirilən prosesdə hökm oxunub.

Hökmə əsasən, Rasim Həsənovun ittiham olunduğu maddələr dələduzluq maddəsinə tövsif olunub. Ona 5 min manat cərimə cəzası tətbiq olunub və məhkəmə zalından azadlığa buraxılıb.

Baş Prokurorluq isə bu hökmdən apelyasiya protestinin veriləcəyini bildirib.

Qurumun yaydığı məlumata görə, məhkəmədə prokuror Rasim Həsənovun 3 il müddətinə dövlət və yerli özünüidarəetmə orqanlarında rəhbər və maddi-məsul vəzifə tutma hüququndan məhrum edilməklə 10 il müddətinə azadlıqdan məhrum edilməsini təklif edib.

“Hökm dövlət ittihamçısına təqdim edildikdən sonra apellyasiya verilməsi məsələsi həll ediləcək”, – qurum bildirir.

Hələlik, Baş prokurorlugun açıqlamasına Rasim Həsənov və onun vəkilindən münasibət almaq mümkün olmayıb.