Almaniyada keçirilən futbol üzrə Avropa çempionatının qrup mərhələsinin III turunda A qrupunun oyunları başa çatıb. 

Frankfurtdakı "Valdştadion"da keçirilən İsveçrə - Almaniya görüşü 1:1 hesabı ilə yekunlaşıb.

Hesabı 28-ci dəqiqədə isveçrəlilərdən Dan Ndoye açıb. Meydan sahibləri 90+2-ci dəqiqədə Niklas Fullkruqla "status-kvo"nu bərpa edib.

Ştutqartdakı "MHP Arena"da keçirilən Şotlandiya - Macarıstan matçı isə macarların minimal hesablı qələbəsi ilə başa çatıb. Yeganə qolu 90+10-cu dəqiqədə Kevin Çobot Şotlandiya yığmasının qapısından keçirib.

Bu nəticələrdən sonra A qrupunda xallarının sayını 7-yə çatıdran Almaniya birinci, xal ehtiyatını 5-ə çatdıran İsveçrə isə ikinci olub. Hər iki komanda AVRO-2024-ün 1/8 finalına yüksəlib.

Macarıstan A qrupunu üçüncü sırada başa vurub. Şotlandiya isə 1 xalla sonuncu olub.