ABŞ Prezidenti Donald Tramp qapalı söhbətlərdə İranla müharibənin Konqresə aralıq seçkilər ərəfəsində Respublikaçılar Partiyasının mövqelərinə mənfi təsir göstərdiyini qəbul etməyə başlayıb.

Bu barədə “The Washington Post“ (WP) Trampın son açıqlamalarından məlumatlı dörd mənbəyə istinadən yazıb.

Nəşrin məlumatına görə, son həftələrdə Tramp partiyanın siyasi vəziyyətinin ciddiliyini daha çox nəzərə almağa və müşavirlərinin təqdim etdiyi sorğulara diqqətlə yanaşmağa başlayıb. Prezidentin müşavirləri də respublikaçıların üzləşdiyi siyasi problemlər barədə onunla getdikcə daha açıq danışırlar.

“Tramp bəzi qərarlarının onun populyarlığının azalmasına və aralıq seçkilərlə bağlı vəziyyətin yaxşı olmamasına gətirib çıxardığını müəyyən dərəcədə anlayır”, – mənbələrdən biri bildirib. Bununla belə, WP-nin digər mənbəsi Trampın məsuliyyəti üzərinə götürdüyü fikri ilə razılaşmayıb və prezidentin əsas problemin özünün bu il seçki bülletenində olmaması olduğunu düşündüyünü deyib.

Nəşr qeyd edib ki, Tramp noyabr seçkiləri ərəfəsində respublikaçı namizədlərə dəstəyi artırmağa çalışır.