Rusiya ilə Azərbaycan münasibətlərdəki böhranı aradan qaldırıblar, indi isə ikitərəfli əməkdaşlığı inkişaf etdirmək lazımdır. Bunu Rusiya Federasiyası Təhlükəsizlik Şurasının katibi Sergey Şoyqu bildirib.

“Məmnunluqla qeyd edirik ki, ikitərəfli münasibətlərdə son böhran dövrü Moskva ilə Bakının birgə səyləri nəticəsində aradan qaldırılıb. İndi liderlər arasında əldə edilmiş razılaşmalara uyğun şəkildə Rusiya-Azərbaycan əməkdaşlığının ardıcıl inkişaf etdirilməsi ümumi vəzifədir”, – o, Təhlükəsizlik Şurasının elmi-ekspert şurası rəyasət heyətinin üzvlərinin iclasında deyib.

Şoyqu həmçinin bildirib ki, Rusiya tərəfi Azərbaycanla münasibətlərin ikitərəfli müqavilə-hüquq baza, o cümlədən ən yüksək səviyyədə imzalanmış Bəyannamə, eləcə də mehriban qonşuluq və tərəfdaşlıq prinsipləri əsasında inkişaf etdirilməli olduğu mövqeyindən çıxış edir.

“Rusiya Federasiyasının Prezidenti [Vladimir Putin] məhz bu istiqamətdə birgə fəaliyyətin tərəfdarı olduğunu dəfələrlə bildirib”, – o əlavə edib.

Aydındır ki, indiki Rusiya ilə yaxın münasibətlər heç kimə yaxşı heç nə vəd etmir. Rusiyada mövcud olan rejim ətraf aləmi özünə ömürlük borclu olan məkan kimi qəbul edir. Üstəlik, hesab edir ki, həmin borc onun ilk tələbi ilə ödənilməlidir. Rusiyanın indiki hakimiyyəti heç bir beynəlxalq qaydanı tanımır, öz maraqları naminə mümkün olan hər yerdə onları pozur. Onu dayandıra biləcək yeganə şey qarşı tərəfin güc nümayişidir. Biz Kremlin qonşu Ermənistana necə təzyiq göstərməyə çalışdığını görürük. Ən əsası isə bütün dünyanın gözü qarşısında hazırda Rusiyanın Ukraynaya qarşı aqressiv özbaşınalığı davam edir. Moskva xüsusi görünən səbəblər olmadan böyük bir qonşu ölkəni məhv etmək istəyir. Bəs belə bir ölkə ilə Azərbaycan yaxşı münasibətlər saxlamalıdırmı? Şoyqu niyə məhz indi bu barədə danışmaq qərarına gəlib?

Məsələ ilə bağlı Pressklub.az-a danışan Milli Məclisin deputatı, tanınmış politoloq Rasim Musabəyov xatırladıb ki, obyektiv reallıqlar mövcuddur.

“Rusiya Azərbaycanla həmsərhəddir, bizi iqtisadi, nəqliyyat və insani əlaqələr birləşdirir. Azərbaycanda 100 mindən çox rus, Rusiyada isə 600 min Azərbaycan vətəndaşı yaşayır. Rusiya Azərbaycanın ikinci-üçüncü ən böyük ticarət-iqtisadi tərəfdaşıdır.

Bu reallıqlar Moskva ilə Bakını hər zaman ən azı mehriban qonşuluq münasibətləri qurmağa sövq edəcək. Bu münasibətlər problemsiz olmaya bilər, amma Moskvada bir şeyi dərk etməlidirlər: Azərbaycan beş il əvvəlki Azərbaycan deyil. Onunla bərabərhüquqlu münasibətlər qurmaq lazımdır. Moskvada bunu nə qədər tez başa düşsələr, münasibətlərimiz də bir o qədər tez bərpa olunar və qarşılıqlı faydalı xarakter daşıyar”, – deputat hesab edir.

Onun fikrincə, Rusiyanın Ukrayna ilə müharibəni dayandırması və Azərbaycanla Rusiya arasındakı münasibətləri də məhdudlaşdıran sanksiya rejiminə son qoyulması çox vacibdir.

“Əgər bütün bunlar baş verərsə, həm Moskva, həm də Bakı mehriban qonşuluq əlaqələrinin inkişafında eyni dərəcədə maraqlı olacaqlar.

Bu münasibətlərin müttəfiqlik qarşılıqlı fəaliyyəti səviyyəsinə qədər bərpa olunacağına çox da inanmıram, amma bunu həyat göstərəcək. Çünki Rusiyanın özündə də çox şey dəyişə bilər. Rusiyadan gələn istənilən müsbət impulsa ən azı yoxlayaraq yanaşmaq lazımdır, hərçənd çox şeyi dəyişmək lazım gələcək. Mehriban qonşuluq münasibətlərinin bərpasına istiqamətlənmək lazımdır, amma illüziyasız və bəzən Moskvadan səslənən pafossuz”, – Musabəyov vurğulayıb.

Rauf Orucov