Ukraynanın Xmelnitski vilayətində hərbi təyyarə qəzaya uğrayıb.

Hərbi Hava Qüvvələrinin (HHQ) "Telegram" kanalında bildirilir ki, qəzaya uğrayan təyyarə "Su-24M" cəbhə bombardmançısıdır.

"İyunun 16-sı saat 19:00 radələrində Ukrayna Silahlı Qüvvələri HHQ-nin Pyotr Franko adına 7-ci taktiki aviasiya briqadasının "Su-24M" cəbhə bombardmançı təyyarəsi qəzaya uğrayıb. "Su-24M"in ekipajı - pilot və şturman Xmelnitski vilayətində tapşırığı yerinə yetirirdi. Təəssüf ki, hər iki pilot - mayor Boqdan Zaqurlyuk və baş leytenant Boqdan Babenko həlak olub", - bəyanatda vurğulanıb.

Qeyd olunub ki, təyyarənin düşdüyü yerdə xilasedicilər və hüquq-mühafizə orqanlarının əməkdaşları fəaliyyət göstərir. İlkin məlumata görə, mülki əhali arasında xəsarət alan yoxdur.

Qəzanın səbəbləri araşdırılır.