“Fransa bütün gücü ilə Cənubi Qafqazda sabitliyin pozulmasına çalışır. 88-ci illərdə SSRİ rəhbərliyinin oynadığı rolu, bu gün  Fransa hökuməti əvəzləyib. Makron Cənubi Qafqaz üçün yeni Qorbaçovdur”. 

Pressklub.az xəbər verir ki, bu sözləri Ümid Partiyasının sədri İqbal Ağazadə öz sosial şəbəkə hesabındakı paylaşımda işlədib.

Partiya sədri xatırladıb ki, əgər Qorbaçov münaqişə başlayanda hüquqa və həqiqətlərə söykənib qərar vermiş olsaydı, münaqişə alovlanmazdı.

“Etmədi... Həm SSRİ-nin dağılma planı, həm ermənipərəstlik imkan vermədi. Guya o vaxtkı DQMV - da iqtisadi vəziyyətin ağırlığı  bəhanəsilə ərazinin dirçəldilməsi üçün 40 milyon rubl (Bu o dövr üçün çox böyük rəqəm idi) vəsait ayrıldı. Guya Qarabağda yaşayan ermənilər aclıq çəkir... İndi humanitar fəlakət adlı oyuna dövrümüzün Qorbaçovu Makron başçılıq edir. Ona Nobel mükafatı verən olmayacaq, lakin Azərbaycanı yenidən işğalla üz-üzə qoymağa da biz imkan verməyəcəyik” – deyə İqbal Ağazadə bildirib.

Partiya sədri xalqı sosial şəbəkələrdə "Stop Fransa" adlı kütləvi etiraz kampaniyasına başlamağa çağırıb.

İ.Ağazadə Fransaya xitabən qeyd edib ki, Azərbaycanın Qarabağ ərazisində yaşayan ermənilərə yardım etmək istəyirsinizsə Gürcüstandan birbaşa Azərbaycana keçin, "Qırmızı Körpü" qapısı açıqdır: “Yox, bizi yenidən oyuna çəkməkdə israrlısınızsa,  haydı, oyunçu aparsın. Bizim uduzmaq şansımız və limitimiz çoxdan bitib! İndi milli birlik 44 günlük savaş dönəmindəki qədər vacibdir. Hər kəs milli mövqeyini və həmrəyliyini nümayiş etdirməlidir. Nə pozulan haqq və hüquqlar, nə demokratik cəmiyyət quruculuğu yolundakı problemlər milli birliyə mane olmamalıdır. Kimsə bu bəhanə ilə düşmən dəyirmanına su tökməsin. Haqqımızı isə Fransa və ya bu qəbildən olan kimsə verməyəcək , özümüz əldə edəcəyik”.

Ümid sədrinin paylaşımı “Öncə Qarabağ! Öncə Vətən!” çağırışı ilə bitir.