Bir qrup ziyalı Prezidentə müraciət edərək ədəbi dilimizin zənginləşməsi prosesini tənzimləyən quruma ehtiyac olduğunu bildiriblər.

Pressklub.az-ın xəbərinə görə, ziyalıların dövlət başçısına müraciətində bildirilir ki, Azərbaycan dili yüzillər boyunca cilalanmaqla daim yenilənib, qazandığı yeni sözlər hesabına zənginləşib və indiki gözəlliyinə çatıb. Həmçinin müraciətdə bu dilin formalaşmasında dahi şairlərimizin, yazıçı və dramaturqlarımızın, eləcə də bir sıra elm və mədəniyyət xadimlərimizin böyük əməyindən bəhs edilib. Bundan əlavə, Heydər Əliyevin ölkəmizdə Azərbaycan dilinin işləkliyinin daim qayğısına qaldığı, dövlət orqanlarında doğma dilimizdən istifadəni ciddi şəkildə tələb etdiyi və  2002-ci ildə imzaladığı fərmanla “Azərbaycan Respublikasında dövlət dili haqqında” Qanun qəbul etdiyi xatırladılıb.

“Bu gün də dövlət dilimizin xüsusi qayğıya ehtiyacı var. Qloballaşmanın, elmi-texniki tərəqqinin sürətli gedişatı dilə yeni sözlərin gəlməsini tələb etdiyi bir dövrdə dilimizə labüd olaraq yeni terminlər daxil olur. Bu terminlərin, demək olar ki,  hamısı əcnəbi dillərdən alınmadır və əksəriyyətinin Azərbaycan dilində qarşılığı yoxdur. Kortəbii termin axını dili zənginləşdirmək əvəzinə, onun təbiətinə zidd meyillərin ortaya çıxmasına səbəb olur. Görünən budur ki, son vaxtlar həyatımızın müxtəlif sahələrində söz yaradıcılığı günün tələbləri ilə ayaqlaşa bilmir. Ona görə də dilə termin axınını şərtləndirən prosesi tənzimləyə biləcək məsul bir qurumun yaradılmasına ehtiyac vardır. Məsələn, qardaş Türkiyə Cümhuriyyətində otuza yaxın ştatlı əməkdaşı olan bir təsisat mövcuddur. Onlar dilin yenilənməsi prosesini nəzarətdə saxlayır, yeni terminlərin türk dilində qarşılığını yaradır”,- ziyalılar bildirib.
Müraciətdə deyilib: “Möhtərəm Prezident! Biz hesab edirik ki, ölkəmizdə də müvafiq qurumun yaradılmasına böyük ehtiyac vardır. Bu qurum dilimizə daxil olan əcnəbi mənşəli terminləri araşdırıb zərurət  yaranarsa, ana dilimizin daxili imkanları hesabına yeni sözlərlə əvəz edə bilər. Səhiyyə, təhsil, iqtisadiyyat, informasiya-kommunikasiya texnologiyaları sahəsində əcnəbi dillərdən alınma terminlər xüsusilə çoxluq təşkil edir. Müvafiq sahələrdə çalışan ixtisaslı kadrların iştirakı ilə belə bir qurum yaradılarsa, Azərbaycan dilinin lüğət tərkibinin mahiyyətcə dolğunlaşması, inkişafı, zənginliklərinin qorunub saxlanması və müasirləşməyə uğurla uyğunlaşa bilməsi üçün çox gözəl imkanlar açıla bilər. İnanırıq ki, təklifimiz dövlət əhəmiyyətli bir məsələ kimi diqqətinizi cəlb edəcək və sırf sözügedən işlərlə məşğul olacaq ştatlı mütəxəssislərdən ibarət müvafiq dil qurumunun yaradılması məsələsi tezliklə həllini tapacaqdır”.

1.    Zümrüd Dadaşzadə, professor

2.    Aida Qasımova, professor

3.    Fəxrəddin Veysəlli, professor

4.    Qulu Məhərrəmli, professor

5.    Ədalət Tahirzadə, professor    

6.    Elmira Məmmədova-Kekeç, professor

7.    Ramazan Qafarlı, professor

8.    Tərlan Quliyev, professor

9.    Seyfəddin Rzasoy, professor

10.        Qurban Bayramov, professor

11.        Səadət Şıxıyeva, dosent

12.        İradə Musayeva, dosent

13.        Əkrəm Bağırov, dosent

14.        Pərvanə Məmmədli, dosent

15.        Dürdanə Rəhimzadə, dosent

16.        Zəminə Rüstəmbəyli, dosent

17.        Könül Nəhmətova, dosent

18.        Aybəniz Rəhimova, dosent

19.        Afaq Yusifli, dosent

20.        Güldəniz Qocayeva, dosent

21.        İsmayıl Məmmədov, dosent

22.        Yeganə Kərimzadə, yazıçı

23.        Nəriman Əbdülrəhmanlı, yazıçı

24.        Fuad Islamzadə, dosent

25.        Vasif Sadıqlı, “Filoloji Araşdırmalar və Dil Monitorinqi Mərkəzi”       İctimai Birliyinin sədri