Deputat Razi Nurullayev yenidən pensiya yaşının azaldırlması təklifi ilə çıxış edib. O, Milli Məclisin iclasında çıxışı zamanı maraqlı məqamlara toxunub.

Pressklub.az xəbər verir ki, millət vəkili qadınların pensiyaya çıxması üçün son yaş həddi 60, kişilərdə isə 62 olmasını təklif edib.

“Deyiləcək ki, dünyada yaş həddi əsasən 65-dir. Lakin bu ölkələrdə tibbi əlçatanlıq, sosial yaşayış, əmək haqları və rahatlıq bizimlə müqayisədə daha yüksək səviyyədədir. Biz özümüzü onlarla necə müqayisə edə bilərik? Biz deputatlar xalqın içindəyik, onların evlərində oluruq, şikayətlərini dinləyirik və yaşayışlarını da çılpaq gözlə görürük”, -deyə o qeyd edib.

Deputatın sözlərinə görə, kəndlərdə, qəsəbələrdə, rayonlarda, Bakının saysız-hesabsız gecəqondularında əhali çətin vəziyyətdə yaşayır: “Buna görə pensiya yaşını azaltmaq çox vacibdir. Yaşlanıb ölənlərin sayı çox azdır. Bütün xəstəliklər çox cavanlaşıb. 30 yaşlı cavan ürəktutmadan ölür, 20 yaşlı gəncin qan təzyiqi var, körpə uşaq onkologiya xəstəliyinə tutulur. Baxıram ki, rəhmətə gedənlərin çoxu 57-62 yaş arasındadır. Hətta qəbiristanlıqlarda monitorinq aparmışam və son zaman ölənlərin əksəriyyəti qocalmayıb, yaşlanmayıb dünyasını dəyişənlərdir. Gərək bu faktları nəzərə alınsın”.