ABŞ nümayəndəsi NATO ölkələrində “çox real” silah çatışmazlığı barədə xəbərdarlıq edib.

Bunu ABŞ-ın NATO-dakı daimi nümayəndəsi Culian Smit deyib.

“Səylər Ukraynaya böyük təhlükəsizlik yardımı göstərən Estoniya kimi ölkələrdə NATO alyansı daxilində ehtiyatların azalmasına yönəlib” - deyə Culian Smit bildirib.

Onun sözlərinə görə, bu ölkə hazırda silah çatışmazlığı ilə üzləşib və oxşar vəziyyət bütün alyansda, eləcə də Ukraynada müşahidə olunur.

Smit bildirib ki, Vaşinqton müttəfiqləri ilə birlikdə müdafiə şirkətlərini məhsullarının uzunmüddətli perspektivdə tələbat olacağına dair təminatlar əsasında silah istehsalını artırmağa və lazım gələrsə, bərpa etməyə inandırmağa çalışır.

Ukraynanın ehtiyacları üçün davamlı silah tədarükü səbəbindən Almaniya ordusunun anbarlarındakı ehtiyatlar tükənir, onlar sözün əsl mənasında “iki günlük döyüş üçün kifayətdir”.

Qeyd edək ki, bunu bir müddət bundan əvvəl hərbi ekspert Oliver Mudi bildirmişdi.

Onun sözlərinə görə, arsenalın bərpası üçün ən azı 20 milyard avroya ehtiyac olacaq.

Onu da qeyd edək ki, daha əvvəl “The New York Times” nəşri NATO ölkələrinin üçdə ikisinin öz anbarlarını demək olar ki, tamamilə boşaltdığını bildirmişdi.

Bununla belə, nəşr əsas “autsayderlər” arasında Polşa və Baltikyanı ölkələrin də adını çəkib.