İstanbul Böyük Şəhər Bələdiyyəsinin sədri Əkrəm İmamoğlu saxlanılıb.

Bu barədə məlumatı “A haber” telekanalı yayıb. Bildirilib ki, İstanbul bələdiyyəsinə qarşı genişmiqyaslı korrupsiya əleyhinə əməliyyat başladılıb.

Əməliyyat çərçivəsində İmamoğlu ilə yanaşı, onun mətbuat katibi Murat Ongun və bələdiyyənin təqribən 100 əməkdaşı barəsində də saxlanılma qərarı çıxarılıb. Onlar arasında Beylikdüzü bələdiyyə sədri Murat Çalık, Şişli bələdiyyə sədri Resul Emrah Şahan və müğənni Ercan Saatçi də var.

Bununla yanaşı, İmamoğluya qarşı irəli sürülən ittihamlar arasında cinayətkar təşkilata rəhbərlik etmək və üzvü olmaq, hədə-qorxu yolu ilə pul tələb etmə, rüşvət alma, şəxsi məlumatların qanunsuz əldə edilməsi və tenderin nəticələrinin saxtalaşdırılması var.

İstanbul prokurorluğu iddia edir ki, İstanbulun meri və digər şəxslər biznesmenləri pul verməyə vadar edib, haqsız qazanc əldə edib və cinayətkar fəaliyyətdən əldə edilən vəsaitləri yuyublar. Prokurorluq Ə.İmamoğlunu “cinayətkar təşkilatın rəhbəri” adlandırıb.

İmamoğlu və Ongunun evində axtarış aparıldığı qeyd olunub. 

Həmçinin qeyd olunub ki, İmamoğlunun evində aparılan axtarış əməliyyatı başa çatıb.