
Atatürkün partiyası prezidentliyə namizədini müəyyən edib
24 Mart 2025
Türkiyənin Cümhuriyyət Xalq Partiyası (CHP) İstanbul meri vəzifəsindən uzaqlaşdırılmış Əkrəm İmamoğlunun prezidentliyə namizədliyini rəsmən elan edib.
Bu barədə ana müxalifət partiyası sosial şəbəkədə paylaşım edib.
“Yolumuz uzun, həyəcanı yüksək gəncliyimiz var!” başlıqlı paylaşım “Prezidentliyə namizədimiz Əkrəm İmamoğlu” yazılı şəkillə müşayiət olunub.
Əkrəm İmamoğlunun namizəliyinin lehinə 1,5 milyona yaxın partiya üzvü səs verib. Eyni zamanda, CHP-nin çağırışı ilə səserməyə qatılan Türkiyənin ümumilikdə 15 milyondan çox əhalisi İmamoğlunun namizədliyini dəstəkləyib.
Xatırladaq ki, martın 23-də, İmamoğlunun “korrupsiya” işi üzrə istintaqı çərçivəsində həbs edildiyi gün, CHP prezidentliyə namizədin müəyyənləşdirilməsi üçün ilkin seçkilər keçirib. Partiya üzvləri üçün standart səsvermədən başqa, partiyasız şəxslərin də səs verə biləcəyi “həmrəylik məntəqələri” yaradılıb. CHP-nin sədri Özgür Özəl səsverməyə 15 milyona yaxın vətəndaşın qatıldığını açıqlayıb. İmamoğlu ilkin seçkilərin alternativsiz namizədi olub.