ABŞ və İsrail İranda enerji infrastrukturu obyektlərinə ən irimiqyaslı bombardmanlardan birini planlaşdırırlar.

Bu barədə "CBS News" telekanalına məlumatlı mənbələr bildiriblər.

Onların məlumatına görə, zərbələr həftəsonu ərzində başlaya bilər. İsrail xəbərdar edilib və öz hərəkətlərini ABŞ ilə əlaqələndirir. Lakin mənbə qeyd edib ki, Amerika lideri Donald Tramp zərbələrə hələ yekun icazə verməyib.

Bu arada israilli məmur "CBS News"a bildirib ki, İsrailə genişmiqyaslı hərbi əməliyyatların bərpası qərarı barədə heç nə məlum deyil və İsrailə İrana qarşı hər hansı hərbi əməliyyatlara qoşulmaq xahişi ilə müraciət olunmayıb.

Mənbələrin sözlərinə görə, hərbi zərbə planı cümə günü Trampın Kemp Deviddəki iqamətgahında administrasiya üzvləri ilə keçirdiyi müşavirədə müzakirə olunub. Prezidentin siyasi məsələlər üzrə bəzi köməkçiləri buna qətiyyətlə qarşı çıxıblar.

Jurnalistlərin iştirakı ilə Tramp bəyan edib: "Biz onlara çox güclü zərbələr endirəcəyik. Hansısa məqamda onlar deyəcəklər: "Biz artıq buna dözə bilmirik".

İki mənbənin sözlərinə görə, zərbələrin hədəfi, ehtimal ki, elektrik stansiyaları və neft emalı zavodları da daxil, enerji infrastrukturu olacaq.

"Prezident Trampın kabinet üzvlərinin iclasında dediyi kimi, Birləşmiş Ştatlar qalib gələcək və onun hakimiyyəti dövründə İranın nüvə silahı olmayacaq", - Ağ Evin mətbuat katibi Kerolayn Levitt telekanala bildirib.

Bu arada Pentaqonun mətbuat katibi Şon Parnell "CBS News"a bildirib ki, qurum prezident yekun qərar qəbul edənə qədər hədəfləri şərh etməyəcək.