(Dünyanın “ərköyün balasının” qaranlıq əməlləri üzə çıxır)

Ermənistan sanksiyalardan yayınmaq üçün keçmiş strateji müttəfiqi və hazırkı “düşməni” Rusiyaya açıq şəkildə dəstək verir. İrəvan bunu gizlətməyə heç cəhd də etmir və əslində, edə də bilməz. Əlahəzrət fakt göz qabağındadır. Əvəzində isə Avropa İttifaqı və ABŞ bunu “görmür”.

Qərb ölkələri bir şeyi açıq şəkildə etiraf edirlər ki, Rusiya sanksiyalardan yayınmağı bacarıb. Moskva bəzi məsələlərdə korluq çəksə də, bu, Qərbin gözlədiyi və planlaşdırdığı dərəcədə deyil. Bəzi ölkələr təkrar ixrac sayəsində Rusiyanın ciddi çətinliklərdən yayınmasına kömək edirlər. 

Əslində, bu və ya digər dərəcədə bütün ölkələr Rusiyaya qadağan olunan mallar göndərirlər. Bunların arasında Türkiyə, Qazaxıstan, Qırğızıstan, Gürcüstan, Ermənistan xüsusi ilə seçilir. Ermənistan isə bu ölkələrin arasında liderlik edir.

Beynəlxalq Maliyyə İnstitutunun (IIF) keçmiş baş iqtisadçısı, “Goldman Sachs”ın keçmiş baş valyuta strateqi və Beynəlxalq Valyuta Fondunun baş iqtisadçısı Robin Bruks İrəvanı Moskvaya sanksiyalardan yayınmaqda kömək etməkdə ittiham edib. Bu barədə o, özünün X sosial şəbəkəsindəki (keçmiş Twitter) hesabında yazıb.

Bruks bildirib ki, Ermənistan heç bir beynəlxalq qadağaya məhəl qoymadan Rusiyaya Avropa İttifaqının sanksiyalarından yayınmağa kömək edir. Bunu, Rusiya-Ukrayna müharibəsi başlayandan sonra Aİ ölkələrindən Ermənistana ixracın kəskin artması da sübut edir.

“Siz Aİ daxilində nə baş verdiyi ilə bağlı sual üzərində düşünməlisiniz. Vladimir Putinin Ukraynaya təcavüzü Avropa İttifaqının müdafiə etdiyi bütün dəyərlərə böyük təhlükədir. Amma buna oxşar çoxlu nümunə var: Müharibə başlayandan Avropa İttifaqından Ermənistana ixrac 200 faiz artıb. Bu mallar Rusiyaya gedir və Putinə kömək edir. Bəs Brüssel nə edir?” – iqtisadçı ritorik sual verib.

Robin Bruks sözlərinə sübut kimi şəxsi hesabında Ermənistana ixracla bağlı cədvəl də dərc edib. Bu cədvəl Ermənistana ixracın birdən-birə son dərəcə kəskin artımını nümayiş etdirir. Ən maraqlısı isə odur ki, ixracın kəskin artması Ukraynada müharibənin başlaması ilə üst-üstə düşür. 

Cədvəldəki məlumatlardan görünür ki, 2022-ci ilin mart ayından Avropa İttifaqı ölkələrindən Ermənistana ixrac 4-5 dəfə artıb. Eyni zamanda, Rusiyanın digər müttəfiqi və əsas çip (mikrosxem) təchizatçısı Çindən də Ermənistana ixrac iki dəfə artıb... 

Ermənistanın Rusiyaya kömək etdiyi heç kimdə şübhə doğurmur. Müharibə başlayandan sonra bu ölkənin Rusiyaya kömək etdiyi bildirilirdi, amma tədbir görülmürdü. Eyni zamanda, Rusiyadan Ermənistana qaçanların bu ölkədə yüzlərlə və şirkət qurduqları açıqlanmışdı. O zaman belə bir iddia irəli sürülmüşdü ki, bu şirkətlər arasında Ermənistan hakimiyyətinin razılığı ilə Rusiyanın özünün də təkrar ixrac üçün yaratdığı onlarla şirkət var. Və bu gün təkrar ixracla məşğul olan həmin şirkətlərin var gücü ilə işlədiyi bir daha sübut olunur.

Ortada isə maraqlı suallar var. 

Əvvəla, niyə Moskvaya qarşı vahid cəbhədən çıxış etdiyini, Ukraynanın yanında olduğunu və müharibə bitməyənə qədər Putin Rusiyası ilə heç bir halda əməkdaşlıq etməyəcəyini bəyan edən Avropa əqidəsinə zidd çıxır? Bu halda şəxsi mənafenin onlar üçün əqidədən də, Ukraynada hər gün ölən yüzlərlə insanın həyatından da üstün olduğu üçün? Təəssüf ki, sualın cavabı aydındır. Avropa vahid deyil və mənafeyini düşünənlər, həqiqətən də Ukraynanın yanında olanları üstələyirlər.

İkinci sual: Ermənistana qarşı niyə heç bir ölçü götürülmür? Bir anlığa təsəvvür edin: bu addımı Azərbaycan atsaydı, bu həcmdə Azərbaycan Rusiyaya kömək etsəydi, təkrar ixracla məşğul olsaydı, nələr baş verə bilərdi? Aİ bir yana, sanksiyaların əsas təşəbbüskarı olan Vaşinqton okeanın o üzündən Azərbaycana hansı təzyiq göstərərdi? Etiraf edək ki, rəsmi Bakının sevərək təkrar etdiyi “ikili standartlar” tezisinin əsası var.

Nəhayət, Ermənistan hakimiyyəti nədən münasibətləri “düşmən” səviyyəsinə çatdığı Rusiyaya yardımı qadağan etmir? Axı, hətta təkrar ixracatla erməni şirkətlərinin deyil, Kremlin Ermənistanda qurduğu saxta şirkətlərin məşğul olduğu iddiasını qəbul etsək belə, hakimiyyətin bu yardımı dayandırmaq üçün bir addımı kifayət etməzmi? 

Bəlkə məsələ daha dərindir və “düşmən” heç də hamıya nümayiş etditildiyi qədər düşmən deyil?

Press Klub