"France Football" nəşrinin təsis etdiyi "Qızıl top" mükafatına iddialı futbolçuların yenilənmiş reytinqi açıqlanıb.

"Goal" nəşrinin hazırladığı siyahıya Argentina millisinin və PSJ-nin hücumçusu Lionel Messi başçılıq edir. O, mükafatı qazanmağa ən real namizəd hesab olunur.

İngiltərənin "Mançester Siti" klubunun forvardı Erlinq Holann ikinci pillədə qərarlaşıb. İlk "üçlüy"ü Messinin Paris təmsilçisindən komanda yoldaşı Kilian Mbappe tamamlayır.

Yenilənmiş reytinqdə əsas dəyişikliklər ikinci "onluq"la bağlıdır. İtaliya "İnter"indən Lautaro Martines, "Milan"dan Rafael Leau və İspaniya "Real Madrid"indən Rodriqo ilk iyirmi futbolçu arasına düşüblər.

Bu arada Lionel Messinin Səudiyyə Ərəbistanının "Əl-Hilal" komandasının təklifini qəbul etmədiyi məlum olub. 36 yaşlı hücumçu gələcəyi ilə bağlı qərarı cari mövsümün sonunda Paris təmsilçisi ilə müqaviləsi başa çatdıqdan sonra qəbul edəcək.

İddiaya görə, ulduz futbolçu "Əl-Hilal"la yanaşı, İspaniya "Barselona"sı və ABŞ-ın "İnter Mayami" klublarına keçmək variantını da götür-qoy edir. Həmçinin, təcrübəli forvardın PSJ ilə sözləşməsini uzatmaq planı da var.

Messi ilə yanaşı, "Barselona"dan Serxio Busgets və Jordi Albanın da "Əl-Hilal"dan gələn təklifi qəbul etmədikləri bildirilib.