Rusiyada hərbi qiyam cəhdi başlayıb.

Pressklub.az xəbər verir ki, “Vaqner” hərbi qruplaşmasının rəhbəri Yevgeni Priqojin “Rusiya xalqını xilas etmək” şüarı ilə silahlı dəstələri ilə Rusiya şəhərlərinə doğru irəliləməyə başlayıb.

Hər şey iyunun 23-də axşam saatlarına Rusiya ordusunun “Vaqner”in mövqelərini raket və aviasiya zərbəsinə tutması ilə başlayıb. Priqojin bunu xəyanət adlandırıb və əmri xüsusi olaraq bu məqsədlə Rostov şəhərinə gələn müdafiə naziri Sergey Şoyqu və Baş Qərargah rəisi Valeri Gerasimovun verdiyini bildirib. Bundan sonra o, hər iki şəxsi “cəzalandırmaq” üçün Rusiyaya doğru irəliləməyə başladıqlarını bildirib.

Gecə saatlarında Rusiya Prezidenti Vladimir Putin təcili olaraq Kremlə qayıdıb. Ölkənin bütün iri şəhərlərində “Qala” əməliyyatı elan olunub, Daxili Qoşunlar, “Rosqvadiya”, Federal Təhlükəsizlik Xidmətinin, polisin qüvvələri ayağa qaldırılıb, vacib obyektlər nəzarətə götürülüb. Yvgeni Priqojinə qarşı isə “silahlı qiyam” maddəsi ilə cinayət işi başlanılıb.

Son məlumatlara görə, bəzi yerlərdə “Vaqner” qruplaşması ilə Müdafiə Nazirliyinin qüvvələri arasında toqquşmalar olub. Priqojin onlara atəş açmağa cəhd edən iki hərbi vertolyotu vurduqlarını bildirib. Bəzi yerlərdə lokal toqquşmalar olduğu xəbər verilir.

Bundan əlavə, Rostov şəhəri qiyamçıların əlinə keçib. “Vaqner” Müdafiə Nazirliyinin Cənub Hərbi Dairəsinin qərargahını, Rostov meriyasını, hökumət administrasiyasını və bir çox başqa dövlət idarələrini ələ keçirib.

Yevgeni Priqojin Rostovun ələ keçirildiyini təsdiq edərək, Moskva üzərinə getdiklərini elan edib.

Bundan əlavə, son məlumatlara görə, “Vaqner”in böyük bir qruplaşması Voronej şəhərinə daxil olub. Şəhərin inzibati binaları və hərbi obyektləri ələ keçirilib.

"Vaqner" qruplaşmasına yaxın KİV-lər Müdafiə Nazirliyinin hərbçilərinin bir hissəsinin onlara qoşulduğunu xəbər verirlər...

[video width="1280" height="720" mp4="http://pressklub.az/wp-content/uploads/2023/06/vid_20230624_084728_315.mp4"][/video]

[video width="720" height="1280" mp4="http://pressklub.az/wp-content/uploads/2023/06/vid_20230624_084751_430.mp4"][/video]

[video width="640" height="352" mp4="http://pressklub.az/wp-content/uploads/2023/06/vid_20230624_090232_923.mp4"][/video]