Ukrayna Silahlı Qüvvələri Rusiyanın Kursk vilayətindəki Nikolaevo-Daryino və Oleşnya yaxınlığındakı mövqelərinə 11 tankın dəstəyi ilə 300-dək hərbçi ilə hücum edib

Bu barədə Rusiya Müdafiə Nazirliyi bildirib. İlkin məlumatda dövlət sərhədini qoruyan qüvvələrin hücumları dəf etdiyi qeyd olunub.

“Bu gün Moskva vaxtı ilə səhər saat 08:00-dan etibarən düşmən Ukrayna Silahlı Qüvvələrinin 22-ci mexanikləşdirilmiş briqadasının 300-dək silahlı qüvvəsi ilə 11 tank və 20-dən çox zirehli döyüş maşınının dəstəyi ilə Kursk vilayətinin Nikolaevo-Daryino və Oleşnya yaşayış məntəqələrinin Rusiya-Ukrayna sərhədinə bilavasitə bitişik ərazilərinə hücuma keçib. Dövlət sərhədini qoruyan qoşunlar Rusiya FTX-nin sərhəd qoşunlarının bölmələri ilə birlikdə dövlət sərhədi və Sumı vilayətində ehtiyatlar zonasında düşmənə hücumları dəf edib və atəşə tutublar", - qurumdan bildirilib.

Lakin axşama yaxın Rusiya kanalları döyüşlərin davam etdiyini və Ukrayna qoşunlarının irəlilədiyini bildiriblər. Rusiya Müdafiə Nazirliyinin saytından da hücumun dəf edildiyi ilə bağlı məlumat çıxarılıb.

Bəzi kanallar səhərə yaxın döyüşlərin genişlənəcəyini və hətta Ukrayna ordusunun Kursk şəhərinə girə biləcəyini qeyd edirlər.