"Putin həqiqətən məni məyus etdi". Bunu ABŞ prezidenti Donald Tramp Londonda Britaniya baş naziri Kir Starmer ilə birgə mətbuat konfransında bildirib.

Tramp Ağ evə qayıtdıqdan sonra yeddi müharibəni həll etməyi bacardığını bir daha vurğulayıb. Bununla belə, etiraf edib ki, Putinlə münasibətlərinə görə həllinin ən asan olacağını düşündüyü Ukrayna münaqişəsi gözləniləndən daha mürəkkəb çıxıb.

Tramp münaqişənin həll olunmamasını "ən böyük məyusluğu" adlandırıb. "Ancaq ümid edirəm ki, sizin üçün yaxşı xəbərlərimiz olacaq", -o əlavə edib.

ABŞ prezidenti bəzi ölkələrin Rusiyanın Ukraynaya qarşı təcavüzünü faktiki olaraq maliyyələşdirərək Rusiya neftini almaqda davam etməsindən də narazılığını bildirib. "Neftin qiyməti düşərsə, Putinin müharibəni dayandırmaqdan başqa yolu qalmayacaq", - Tramp vurğulayıb.

Tramp Rusiya ilə Ukrayna arasında atəşkəs üçün uyğun zamanın gəlib çatdığına dair şübhələrini də ifadə edib. Tramp bu fikirləri Böyük Britaniyadan ABŞ-yə uçuş zamanı öz təyyarəsində Ağ Evin mətbuat nümayəndələrinə bildirib.

"Belə görünmür... Amma uyğun zamanda bunu etməli olacağıq. Bu, çətin olacaq", – deyə Tramp qeyd edib.

Tramp dəfələrlə Putindən məyusluğunu ifadə edib. O, "səbri tükəndiyi üçün" "Rusiyanı sanksiyalarla çox sərt vuracağı ilə hədələyib. "Putin bunu (nizamlamaya nail olmaq) istəyəndə Zelenski istəmədi. Zelenski istəyəndə Putin istəmədi. İndi Zelenski bunu etmək istəyir, Putin - sual işarəsidir", - ABŞ prezidenti izah edib.

Rusiyanın xarici işlər naziri Sergey Lavrov Trampın nizamlama tempindən məyusluğunu qismən onun "sürətli qərarlar istəməsi" ilə əlaqələndirib.