ABŞ prezidenti Donald Tramp oktyabrın 28-də bildirib ki, Braziliyada bazar günü keçirilən prezident seçkisində uduzan senator Flavio Bolsonaronun ABŞ-yə gəlməsini dəstəkləyir.

Bolsonaro Braziliyanı tərk edərək Birləşmiş Ştatlara yollanıb. "Reuters" agentliyinin ABŞ Dövlət Departamentinin yüksəkvəzifəli rəsmisinə istinadən yaydığı məlumata görə, Vaşinqton ona və ailə üzvlərinə ölkəyə giriş vizası verəcək.

Tramp jurnalistlərə "Əlbəttə, bunu dəstəkləyirəm" deyib və Bolsonaronun Argentinada olduğunu eşitdiyini bildirib.

Bolsonaro hazırkı solçu prezident Luiz İnasio Lula da Silvaya məğlubiyyətini etiraf etməyib. O, Ali Məhkəmənin pasportunu təhvil vermək qərarına məhəl qoymayaraq Braziliyanı tərk edib.

Tramp seçkilərin "çox qəribə" keçdiyini və "çox mənfi" qiymətləndirildiyini söyləyib.

F.Bolsonaro barəsində artıq korrupsiya şübhəsi ilə istintaq aparılır. Bu araşdırma onun atası, sabiq prezident Jair Bolsonaro haqqında çəkilən filmin maliyyələşdirilməsi ilə bağlıdır. Dövlət çevrilişi hazırlamaqda ittiham olunan J.Bolsonaro isə ev dustaqlığına buraxılıb.

Braziliya Ali Məhkəməsi oktyabrın 27-də polisə F.Bolsonaronun seçki kampaniyasına qanunsuz maliyyə ayrılıb-ayrılmamasını da yoxlamağı tapşırıb.

45 yaşlı senator oktyabrın 25-də keçirilən prezident seçkisində məğlubiyyətə uğrayıb. O, seçkilərin ikinci turunda Luiz İnasio Lula da Silvaya uduzub. Birinci turun nəticələrinə görə lider olan Bolsonaronun qalib gələcəyi ilə bağlı gözləntilər olduqca yüksək idi. Yekunda Lula səslərin 51.79 faizini, Bolsonaro isə 48.21 faizini qazanıb.