Ukrayna müharibənin hazırkı cəbhə xətti boyunca dondurulması və danışıqlara başlanılması təşəbbüsünü dəstəklədiyini açıqlayıb.

Bu barədə Ukraynanın xarici işlər naziri Andriy Sibiqa “X” sosial şəbəkəsində paylaşım edib. O, Qazaxıstan Prezidenti Kasım-Jomart Tokayevin Rusiya Prezidenti Vladimir Putinə müharibənin dayandırılması ilə bağlı çağırışını yüksək qiymətləndirib.

“Prezident Tokayevin Putinə müharibəni dayandırmağın vaxtının çatdığı barədə mesajına görə minnətdarıq. Bu, realist, vaxtında verilmiş və müdrik mesajdır”, – deyə Andriy Sibiqa bildirib.

Nazir vurğulayıb ki, Ukrayna müharibənin hazırkı cəbhə xətti boyunca dayandırılmasını və diplomatik danışıqlara keçilməsini təklif edib. Lakin onun sözlərinə görə, Kreml bu sülh yolunu hələ də qəbul etmir. Sibiqa əlavə edib ki, Moskvanın real sülh təşəbbüslərini qəbul etməsi üçün Rusiyaya beynəlxalq təzyiq daha da artırılmalıdır.