“Bununla Rusiya dünya bazarında rubla tələbat formalaşdırmağa və onun dönərli valyutaya çevrilməsinə nail olmağa çalışır”.

Bunu İqtisadi və Sosial İnkişaf Mərkəzinin rəhbəri Rəşad Həsənov Avropaya qazın nəqli zamanı ödənişin yalnız rublla həyata keçirilməsi barədə Rusiyanın verdiyi qərarın nə demək olduğuna aydınlıq gətirərkən deyib:

“Burada əsas məqsəd Rusiyadan qaz alan, xüsusən də dost olmayan ölkələrin rublla yığım etməsinə nail olmaqdan ibarətdir. Yəni həmin ölkələr ödənişi rublla həyata keçirsə, məcburdur ki, öz ehtiyatlarının bir qismini məhz Rusiya valyutasında saxlasın. Belədə, Rusiya dünya bazarında rubla tələbatın yaranmasına çalışır”.

Bu baş verərsə müəyyən mənada rubl da möhkəmlənəcək:

“Şirkətlər rubl yığmalıdır, bu da ona tələbat yaradacaq. Onun özü də dolayısı ilə qismən də olsa rublun möhkəmlənməsinə gətirib çıxaracaq”.

Ancaq ekspert qeyd edir ki, bu addım Rusiyaya geniş mənada deyil, qismən kömək edəcək:

“Məsələ ondadır ki, rubl rus bazarına daxil olsa da, şirkətlər digər öhdəliklərini yerinə yetirmək üçün yenə də bazardan valyuta tələb edəcək. Yəni aldığı rublu sonradan valyutaya çevirmək təşəbbüsündə bulunacaqlar. Nəticədə daxili bazarda yenə də xarici valyutaya tələb yaradacaq”. (Bizim.Media)