Rusiya Ali Məhkəməsi Ukraynanın “Azov” millətçi alayını terror təşkilatı kimi tanıyıb və onun RF-dəki fəaliyyətini qadağan edib.

Bu barədə TASS xəbər verir.

Məhkəmə qərarının yalnız icraat hissəsi elan edilib və motivləri məlum deyil. Qərar hələ qüvvəyə minməyib və apellyasiya instansiyasına şikayət verilə bilər.

Prokurorluğun iddiasına baxılma qarşı tərəfin nümayəndələrinin iştirakı olmadan keçirilib. İclasın böyük hissəsi qapalı rejimdə olub. Şahidlər qismində Rusiya hüquq müdafiəçiləri və jurnalistləri çıxış ediblər. Onlar məhkəməyə “Azov” yaraqlılarının çoxsaylı cinayət faktları barədə məlumat veriblər. Məhkəmədə “Azov” yaraqlıları tərəfindən qohumları öldürülən, oğurlanan və ya işgəncələrə məruz qalan Mariupol və  Volnovaxa sakinlərinin müsahibələri nümayiş etdirilib.

Məhkəmə tərəfindən terrorçu hesab edilən təşkilatın iştirakçıları cinayət məsuliyyətinə cəlb olunacaqlar. Yaradıcılar və rəhbərləri 15 ildən 20 ilədək azadlıqdan məhrumetmə cəzası və 1 milyon rubla qədər cərimə, sıravi iştirakçıları isə 5 ildən 10 ilədək azadlıqdan məhrumetmə cəzası və 500 min rubla qədər cərimə gözləyir. İstintaqın başlanmasına qədər təşkilatdakı fəaliyyətini könüllü şəkildə dayandıranlar cinayət məsuliyyətindən azad edilirlər.