Qarabağa keçən İran terror-diversiya qrupunun üzvlərinin ADLARI
02 Dekabr 2022
İran İslam Respublikasının 14 vətəndaşının Azərbaycandakı Rusiya sülhməramlıların müvəqqəti nəzarət etdiyi ərazilərə keçməsi haqda məlumatlar gündəmdən düşmür. Noyabrın 24-də günorta saatlarında sülhməramlıların postunu keçərək Azərbaycan ərazisinə gələn xarici vətəndaşlar hələ də Xankəndidə qalırlar. Lakin ölkə mediasının bu barədə yazdıqlarına nə Rusiya Xarici İşlər Nazirliyi, nə də Müdafiə Nazirliyi reaksiya verir. Bu faktın iki ölkə arasındakı rəsmi diplomatik təmaslarda müzakirə olunub-olunmadığı barədə də heç bir informasiya yoxdur.
Qeyd edək ki, məlumatı ilk olaraq yayan qafqazinfo.az saytı İranın ölkəmizdəki səfirliyi ilə əlaqə saxlayaraq, məsələyə aydınlıq gətirilməsini istəyib. Lakin zənglər də cavabsız qalıb – iranlı diplomatlar vətəndaşlarının kimliyi və Azərbaycan ərazisinə gizli səfərin məqsədləri haqda danışmaq istəmirlər. Sayt həmin şəxslərin sərhədi hansı adlar altında keçdiklərini öyrənib və onların bəzilərinin fotolarını əldə edib.
Artıq məlumat verildiyi kimi, noyabrın 24-dən Xankəndində olan və hələ də oranı tərk etməyən 14 nəfərdən 12-si İranın cənub-qərbindəki İzeh şəhərindəndir. Belə təsadüfə inanmaq çətindir. Xüsusilə də İzeh şəhərində İran xüsusi xidmət orqanlarının terror-diversiya üzrə ixtisaslaşan məxfi bazasının yerləşməsi haqda məlumatlar, bu şəxslərin təvəllüdləri (əsasən, 30-40 yaş arası), səfərin məxfiliyi və bir sıra digər məqamlar söhbətin İranın xüsusi xidmət orqanlarının əməkdaşlarından getdiyinə dair ehtimalı bir daha təsdiqləyir.
Daha bir maraqlı məqam sosial şəbəkələrdə uzun-uzadı axtarışlarına baxmayaraq, bu 14 nəfərin heç birinin hesablarının aşkarlanmamasıdır. İndiki zamanda sosial şəbəkələrdə heç bir izin olmaması çox nadir haldır. Üstəlik, söhbət bir yox, 14 nəfərdən gedir. Bu adamlar hansı məxfi fəaliyyətlə məşğuldurlar ki, sosial şəbəkələrdən uzaqdırlar? Adətən, belə yanaşma hərbçi və ya xüsusi xidmət orqanlarının əməkdaşlarına xas olur.
Digər tərəfdən, Xankəndinə gəlmiş qrup üzvlərinin sənədlərindəki adların saxta olması da mümkündür – kəşfiyyat orqanları üçün bu, adi haldır.
Amma istənilən halda, 7 gün əvvəl rusiyalı sülhməramlıların Xankəndinə buraxdıqları İran vətəndaşları Qarabağa məhz bu adlarla keçiblər:
Mohmadi Vahab Mehralı
Heidari Abdollah Alah Rahm
Mohmadi Daryoosh Avaz
Amiritolmarani Elsa Mohammad
Salahshouri Dourakı Farzad Nader
Mohmadi Aref Hossein
Almasian Nezhad Ebrahim Mohammad
Mohmadi Abdollah Mehr Ali
Mohmadi Nasrolah Mehr Ali
Safari Hossein Hatam
Kouravand Takht Sabzı Alı Shir Hossein
Mohmedi Omid Mehr Ali
Mohammadı Mokhtar Bar Ahmad
Salahshouri Dourakı Keramat Nader