ABŞ Konqresinin Nümayəndələr Palatasının keçmiş spikeri, ermənipərəst konqresmen Nensi Pelosi 2026-cı ilin noyabrında Konqresə keçiriləcək seçkilərdə namizədliyini irəli sürməyəcəyini açıqlayıb.

Bu barədə CNN xəbər verir.

"Mən yenidən namizədliyimi irəli sürməyəcəyəm", - o bildirib.

85 yaşlı Nensi Pelosi San-Fransiskodakı seçicilərinə ünvanladığı və onun siyasi bioqrafiyasından kadrlarla müşayiət olunan videoçarxda qırx ilə yaxın davam edən karyerasını başa vurduğunu elan edib.

ABŞ Prezidenti Donald Tramp "Fox News"a açıqlamasında Nensi Pelosinin təqaüdə çıxmasını Amerika üçün böyük bir hadisə adlandırıb və onu “çox şişirdilmiş siyasətçi” adlandırıb.

Tramp Pelosinin 2026-cı ilin noyabr seçkilərində Konqresə yenidən namizədliyini irəli sürməyəcəyi ilə bağlı açıqlamasını şərh edərkən bildirib:

"O, pis, korrupsioner idi və ölkəmiz haqqında yalnız pis düşünürdü. Partiyası üzərində nəzarəti sürətlə itirirdi və heç vaxt onu geri qaytara bilməyəcək. Məni iki dəfə impiçment etməsi və iki dəfə uğursuz olması ilə çox fəxr edirəm".