Məhsullarını Rusiya bazarlarına satmağı planlaşdıran çoxsaylı istixana sahibləri hazırda çətin vəziyyətə düşüb.

Bu barədə Baku TV süjet hazırlayıb.

Bildirilib ki, kifayət qədər məhsul var, külli miqdarda xərc və zəhmət çəkilib, lakin məhsullarına alıcı tapılmır. Salyan rayonunun Qarabağlar kəndində onlarla istixana hazırda daxili bazara məhsul çıxarır ki, bu da qoyulan vəsaitin qarşılanmasına belə bəs etmir.

Rusiya bazarlarına ixrac üçün daha keyfiyyətli və bahalı sortlardan istifadə edən sahibkarlar satış bazarı olmadığından müflis olacaqlarını bildirirlər. Bu həm də istixanalarda daimi və mövsümi çalışan kifayət qədər işçi qüvvəsinin işsiz qalmasına gətirib çıxaracaq. Kənd təsərrüfatı malları keyfiyyətini və istifadə müddətini tez itirdiyindən indi sahibkarlar özləri alıcı axtarışındadır.