İsraildə noyabrın 1-də keçirilmiş parlament seçkisinin ilkin nəticələri açıqlanıb. Sabiq baş nazir Benyamin Netanyahunun liderlik etdiyi Likud Partiyası önə çıxaraq 120 yerlik parlamentdə 29 yer götürür.

İndiki baş nazir Yair Lapidin Gələcək Var Partiyasının 17 mandat aldığı, parlamentə daha 11 siyasi qüvvənin düşdüyü vurğulanır.

Hökumət qurmaq üçün 61 mandat lazımdır.

1949-cu il təvəllüdlü Benyamin Netanyahu İsrail hökumətinə 1996-1999 və 2009-2021-ci illərdə rəhbərlik edib.

Son illər İsrail davamlı hökumət böhranı yaşayır. 2019-cu ildə keçirilmiş iki parlament seçkisindən sonra hökumət qurmaq alınmayıb. 2020-ci ilin parlament seçkisindən sonra qurulan hökumətin ömrü uzun olmayıb, ilin sonunda qanunverici orqan buraxılıb.

2021-ci il martın 23-də yeni parlament seçilib, iyunun 13-də hökumət qurulub, baş nazir postuna Yeni Sağlar İttifaqının lideri Naftali Bennet gətirilib. Koalisiya razılaşması iki ildən sonra baş nazir vəzifəsinin Gələcək Var Partiyasının lideri Yair Lapidə verilməsini nəzərdə tutub. Ancaq 2022-ci ilin iyun ayında koalisiyada parçalanma yaranıb. İyunun 30-da İsrail parlamenti özünü buraxmaq və noyabrın 1-də növbədənkənar seçki keçirilməsi barədə qərar qəbul edib, Naftali Bennet baş nazir postundan ayrılıb, onu Yair Lapid əvəzləyib.