Gürcüstan Mərkəzi Seçki Komissiyası Mixail Kavelaşvilini Gürcüstanın altıncı prezidenti elan edib. 

MSK bəyan edib ki, o, 300 seçicidən 224-nün səsini toplayıb.

Səsvermə yerli vaxtla saat 09:00-dan 14:00-dək keçirilib. Seçkilərdə Seçki Kollegiyasının 225 üzvü iştirak edib, bir bülleten etibarsız hesab olunub.

M.Kavelaşvili yeganə namizəd olub. Onun namizədliyi hakim "Gürcü Arzusu - Demokratik Gürcüstan" partiyası tərəfindən irəli sürülüb.

Nə Gürcüstan prezidenti Salome Zurabişvili, nə də müxalifət bu seçkinin legitimliyini tanıyıb.

Prezident S.Zurabişvili seçki barədə deyib: “Heç nə olmayıb. Heç kim heç kimi seçməyib. Heç nə baş verməyib”.

Gürcüstan parlamentinin yerləşdiyi ərazi polis kordonu ilə əhatələnib. İctimai nəqliyyatın hərəkəti dayanıb. Tbilisidə etirazlar gözlənilir.