Ermənistan: Rusiya ilə işləyirik ki, Laçın dəhlizi mümkün qədər tez açılsın
21 Dekabr 2022
Yüksək rütbəli Ermənistan rəsmisi deyib ki, hökumət Laçın dəhlizində hərəkətin bərpası üçün Rusiya ilə işləyir. 9 noyabr üçtərəfli Bəyanata əsasən, Laçın dəhlizində təhlükəsizlik zəmanətini təmin edən Rusiya Federasiyasıdır, Ermənistan Təhlükəsizlik Şurasının katibi Armen Qriqoryan parlamentin növbədənkənar iclasında deyib.
Şuşa-Xankəndi yolunda keçirilən aksiyanın 9-cu günündə tanınmamış "Dağlıq Qarabağ hakimiyyəti" yolun onlar üçün bağlı qaldığını bildirir. Azərbaycan nümayəndələri mülki nəqliyyatın hərəkətinə mane olmadıqlarını, yolun rus sülhməramlıları tərəfindən bağlandığını bildirirlər. Rusiya sülhməramlıları bu məlumatı təkzib edirlər.
Mediada aksiya keçirilən yoldan Beynəlxalq Qırmızı Xaç Komitəsi, təcili yardım və yük maşınlarının keçdiyini göstərən videolar yayılıb.
"Bu gün biz təcili tibbi yardıma ehtiyacı olan xəstənin Laçın yolu ilə Ermənistana aparılmasına şərait yaratdıq. Neytral vasitəçi rolumuzun tərkibi kimi, bu cür əməliyyatları davam etdirməyə hazırıq", - qurumun tvitində deyilir.
Erməni mənbələri təcili tibbi yardım maşını ilə "Artsax Respublikası Səhiyyə Nazirliyinin Tibb Mərkəzi"ndən Ermənistan Respublikasının ixtisaslaşmış tibb mərkəzinə təcili əməliyyata ehtiyacı olan ürək xəstəsinin köçürüldüyünü xəbər verir.
Tanınmamış "Dağlıq Qarabağ hökuməti" Laçın dəhlizinin bağlanmasına görə, humanitar problemlərin yaşandığını bildirir.
Ötən həftədən bəri Azərbaycan mediasında aksiya keçirilən yoldan maşınların keçdiyini göstərən görüntülər yayılmaqdadır. Bakıda yolun bloklanması ilə bağlı ittihamları rədd edirlər. Azərbaycan Xarici İşlər Nazirliyi "erməni sakinlərin humanitar ehtiyaclarını" qarşılamağa daim hazır olduğunu bildirib.
Bu arada Ermənistan parlamentində müzakirələr vaxtı Laçın yolu ilə bağlı vəziyyətə görə məsuliyyətin Rusiya üzərinə düşdüyünü deyirlər.
"Hansı ölkənin məsuliyyət daşıdığı və nə baş verdiyi göz qabağındadır. Biz bu məsələdə Rusiya ilə işləyirik ki, dəhliz tez bir zamanda açılsın.
Mən müxalifəti də bu istiqamətdə işləməyə çağırıram ki, Rusiya öz öhdəliklərini yerinə yetirsin və Laçın dəhlizində nəqliyyatın fasiləsiz və təhlükəsiz hərəkətini təmin etsin", - çərşənbə axşamı günü Ermənistan Təhlükəsizlik Şurasının katibi Armen Qriqoryan parlamentin növbədənkənar iclasında deyib.
Bölgədə yerləşdirilən Rusiya sülhməramlıları kontingenti (RSK) "Ermənistan və Azərbaycan tərəfləri" ilə danışıqlar apardığını bildirib.
Bu barədə Rusiya Müdafiə Nazirliyinin saytında ötən gün yayılan rəsmi açıqlamada deyilir.
Avropa İttifaqı, ABŞ da daxil, bir sıra ölkə, habelə beynəlxalq qurumlar tərəfindən Laçın yolunun açılmasına dair çağırışlar səslənir.
Şuşa-Xankəndi yolunda RSK postu yaxınlığındakı aksiya dekabrın 12-də başlayıb. Etirazçılar RSK-nın məsuliyyət zonasındakı mədənlərə baxış keçirmək istəyən azərbaycanlı mütəxəssislərin əraziyə buraxılmasını tələb edirlər.
Laçın yolunda yaşanan gərginlik fonunda Bakı ilə Yerevan bir-birini sərhəddə atəşkəsi pozmaqda ittiham edir.
Azərbaycan o cümlədən, son günlərdə Qarabağdakı Rusiya sülhməramlılarının məsuliyyət zonasında yerləşən erməni hərbçilərinin Azərbaycan hərbi mövqelərinə atəş açması ilə bağlı məlumatlar yayır. Ermənistan tərəfi bu məlumatları təkzib edir. (BBC)
