Ermənistanın iqtisadiyyat naziri Qevork Papoyan yanvarın 13-də bildirib ki, onun ölkəsi hələlik Avrasiya İqtisadi İttifaqını (Aİİ) tərk etməyi planlaşdırmır.

Bu barədə o, Yerevanın Avropa İttifaqına (Aİ) üzv olmaq istəyinə dair Rusiyanın xəbərdarlığına cavab olaraq deyib.

"Aİİ-dən çıxma məsələsi hazırda Ermənistan hökumətinin gündəmində deyil. Heç bir şəraitdə Aİİ-ni başqa bir şeylə əvəz etməyi planlaşdırmırıq. Biz müstəqil olmaq istəyirik, müstəqillik isə yalnız bir qurumdan yox, hamıdan asılı olmaq və hər kəsin müəyyən qədər sizdən asılı olmasıdır", - Papoyan mətbuat konfransında bildirib.

Ermənistan hökumətinin digər bir üzvü, maliyyə naziri Vahe Ovannisyan Aİİ-dən çıxma ehtimalını istisna etməsə də, bunun nə zaman baş verəcəyini bilmədiyini deyib. Nazir bunun ölkəsi üçün "riskli" bir ssenari olacağını etiraf edib.

Ermənistan hökuməti keçən həftə "Ermənistanın Avropa İttifaqına üzvlük prosesinin başlanması" ilə bağlı qanun layihəsini təsdiqləyib. Moskva isə bu addımı qınayıb. Rusiya baş nazirinin müavini Aleksey Overçuk bunun "Ermənistanın Aİİ-dən çıxmasının başlanğıcı" olduğunu bildirib. O, Ermənistanın Rusiya bazarına rüsumsuz girmək imkanını itirməsi, Rusiyadan təbii qaz və ərzaq alarkən daha yüksək qiymətlər ödəyəcəyi barədə xəbərdarlıq edib.

Ermənistan hökumətinin məlumatına görə, 2024-cü ilin yanvar-noyabr aylarında Rusiyanın Ermənistanın xarici ticarətindəki payı 41 faizi keçib, Avropa İttifaqının payı isə 7.5 faiz olub. Aİ ilə ticarət 14 faiz azalıb və 2.1 milyard dollar təşkil edib.

Rusiya-Ermənistan ticarəti 2022-ci ildən bəri kəskin artıb, erməni sahibkarlar Rusiyanın Ukraynaya təcavüzündən sonra Qərbin ona qarşı tətbiq etdiyi sanksiyalardan yararlanıblar. Rusiya həmçinin Ermənistanın əsas təbii qaz və nüvə yanacağı tədarükçüsüdür.

Ermənistan "Qazprom" şirkətinə Rusiyadan aldığı hər min kubmetr qaz üçün 165 dollar ödəyir. Hazırda Aİ-də topdansatış qaz qiymətləri bundan üç dəfə yüksəkdir.