Çin Xalq Respublikasının Sədri Si Cinpin ABŞ Nümayəndələr Palatasının sədri Nensi Pelosinin Tayvana səfərini şəxsən şərh edib.

Bu barədə Çin mətbuatı xəbər verir.

"Pelosinin Tayvana səfəri imperialistlərin qeyri-sivil kampaniyasının növbəti nümayişidir. Biz Amerika irticaçılarının bircə təxribatını belə qaçırmamaq üçün dünyaya geniş gözlə baxmağa davam edirik", - Çin Sədrinin bəyanatında deyilir.

Qeyd edək ki, Çinin Mərkəzi Televiziyası da ölkə ordusunun Tayvan yaxınlığındakı təlimlərinin başlamasını əks etdirən kadrlar nümayiş etdirib.

Çinin ABŞ-dakı səfiri Tsin Qanq da rəsmi Pekinin Pelosinin səfərindən qəzəbləndiyini bildirib.

"Biz cavab vermək və suverenliyimizi və ərazi bütövlüyümüzü qorumaq üçün bütün mümkün tədbirləri görəcəyik və cavabımız çox qətiyyətli, ağır, güclü olacaq", - Çin səfiri qeyd edib.

Diplomat qeyd edib ki, Pelosi Amerika hakimiyyətinin ən yüksək eşelonunu təmsil edir, buna görə də onun Tayvana səfərini adi hadisə kimi qəbul etmək olmaz.

Çin Xarici İşlər Nazirliyi isə ABŞ səfirini çağırıb.

Məlumata görə, Çinin xarici işlər nazirinin müavini Xie Fen ABŞ-ın bu ölkədəki səfiri Nikolas Börnsə etiraz məktubu təqdim edib.

"Bu hərəkətlər son dərəcə pis xarakter daşıyırdı, nəticələri çox ağır olacaq. Çin heç bir halda biganə qalmayacaq", - nazir müavini deyib.