Ermənistanın baş naziri Nikol Paşinyan bəyan edib ki, erməni cəmiyyəti “müvəqqəti dayanacaq psixologiyasından” imtina etməli və ölkəni yekun vətən kimi qəbul etməlidir.

Onun sözlərinə görə, vətən axtarışı prosesi artıq başa çatıb: “Biz öz vətənimizi tapmışıq və bu, Ermənistan Respublikasıdır”.

“Əgər bizim şüuraltımızda daim Van, Muş, Qarabağ, Naxçıvana qayıtmaq fikri yaşayırsa, biz öz ölkəmizi keçid məntəqəsi kimi qəbul etməyə başlayırıq”, – o əlavə edib.

Paşinyan qeyd edib ki, belə yanaşma ölkəni “keçid məntəqəsinə” çevirir, insanları təhlükəsizlik və sabitlik hissindən məhrum edir. Hökumət başçısı Qarabağ ermənilərinə də müraciət edərək onları Ermənistanda məskunlaşmağa və bu ölkəni daimi yaşayış yeri kimi qəbul etməyə çağırıb.

Aydındır ki, baş nazir tamamilə sağlam və rasional fikirlər səsləndirir və reallıqda ermənilərin dinc gələcəyə aparan başqa yolu sadəcə yoxdur. Amma maraqlıdır, erməni cəmiyyətinin hansı hissəsi Paşinyanın bu çağırışlarını qəbul etməyə hazırdır? Yaxın perspektivdə neçə erməni yeni dəyərlər və istiqamətlərlə razılaşıb onları qəbul edə biləcək? Bu proses onlar üçün nə qədər uzun və ağrılı ola bilər? 

Pressklub.az-ın suallarını cavablandıran politoloq, Milli Məclisin deputatı Rasim Musabəyov xatırladıb ki, Nikol Paşinyan İkinci Qarabağ müharibəsindəki ağır məğlubiyyətdən və onun ardınca vurulan sarsıdıcı zərbələrdən sonra daha realist düşünməyə başlayıb. 

“Bu, onda belə bir qənaəti möhkəmləndirdi ki, Azərbaycanla hərbi qarşıdurmanın davamı Ermənistan üçün fəlakətlə nəticələnəcək. Onlar Azərbaycan ərazisindən çıxmağa məcbur oldular. Amma Azərbaycandan (təkcə Qarabağ zonası deyil, həm də Gəncə, Ağcabədi, Bərdə və Tərtər) fərqli olaraq Ermənistan ərazisi ciddi hərbi zərbələrə və dağıntılara məruz qalmadı. Paşinyan anlayır ki, münaqişə davam edərsə, növbəti dağıntılar artıq Ermənistan ərazisində olacaq və o, bunun qarşısını almaq istəyir.

Əhalinin böyük hissəsi Qarabağdakı məğlubiyyəti qəbul etməyə və onları ərazi işğalına sürükləmiş “Miatsum” ideyasının iflasını etiraf etməyə hazır olmasa da, ermənilərin əksəriyyəti artıq bu layihənin dirçəldilməsi uğrunda nə döyüşmək, nə də ölmək istəyir. Nikol Paşinyana qarşı dərin məyusluğa baxmayaraq, cəmiyyətdə sağlam düşüncə qalib gəlir: insanlar anlayırlar ki, nə Koçaryan, nə Samvel Karapetyan, nə də Tsarukyan bu vəziyyəti yenidən dəyişə bilməz. Hakimiyyətləri dövründə siyasi banditizm və korrupsiyaya görə “Qarabağ klanı”nın liderlərinə, xüsusilə də Robert Koçaryana qarşı nifrət və hətta düşmən münasibəti mövcuddur”, – ekspert bildirib.

Onun sözlərinə görə, bu, Ermənistanda sağlam düşüncənin tədricən güclənəcəyini düşünməyə əsas verir.

“Əgər Nikol Paşinyan seçki kampaniyasını uğurla başa vurarsa, Ermənistanda “Miatsum” ideyasından imtina istiqamətində dönüş baş verə bilər. Lakin fobiyalar və xəyali ağrılar uzun müddət qalacaq. Türkiyə ərazisini tərk etmələrindən 100 il sonra belə bir çox erməni hələ də nostalji və Türkiyədən torpaq “qoparmaq” arzusu ilə yaşayır. Azərbaycana münasibətdə də uzun müddət oxşar əhval-ruhiyyə mövcud olacaq. Bununla belə, bunun konkret hərəkətlərə çevrilməsi ehtimalı azdır. Nikol Paşinyanın qələbə ehtimalı kifayət qədər yüksəkdir və bu da həmin məsələdə dönüş yaratmalıdır”, – Rasim Musabəyov hesab edir.

Rauf Orucov