Bazar ertəsi Tehranda İran prezidenti Məsud Pezeşkianla Azərbaycan baş nazirinin müavini Şahin Mustafayev arasında görüş keçirilib. Bu barədə İRNA agentliyi məlumat yayıb. 

Görüş zamanı Pezeşkian iki ölkə arasında əməkdaşlığın genişləndirilməsinin vacibliyini qeyd edib. O, təhlükəsizlik məsələlərini və bununla bağlı problemləri həll etməyə çağırıb və deyib ki, İran hökumətinin siyasətinin mahiyyəti budur. Pezeşkian "insanlar arasında ünsiyyət və informasiya mübadiləsinin asanlaşdırılmasının" vacibliyini də vurğulayıb.

"Ölkələr arasında təhlükəsizliyi, sülhü və ünsiyyəti möhkəmləndirmək və təşviq etmək üçün sərhədlərdə divarlar ucaltmağa ehtiyac yoxdur", - o qeyd edib.

İkitərəfli iqtisadi layihələrə toxunan İran prezidenti deyib: "Biz iki ölkə arasında dəmir yolu və avtomobil yollarının yaradılmasını alqışlayırıq. Həmçinin energetika və kənd təsərrüfatı sahəsində əməkdaşlığın davam etdirilməsini və genişləndirilməsini istəyirik".

Pezeşkian Azərbaycanın Tehrandakı səfirliyinə silahlı hücumla bağlı məsələyə də toxunub. Terrorçunun aqibəti barədə danışan İran prezidenti deyib: "Biz hüquqi proseslər tam həyata keçirilənə qədər bu işi izləyəcəyik".  Bu zaman o, hansı proseslərdən söhbət getdiyini dəqiqləşdirməyib.

Öz növbəsində Şahin Mustafayev Bakının Tehran ilə energetika, avtomobil və dəmir yolu əlaqəsi, təhlükəsizlik, müdafiə və mədəniyyət sahələrində əlaqələri genişləndirməyə hazır olduğunu bildirib.

Şahin Mustafayev Pezeşkianı COP29 iqlim konfransında iştirak etmək üçün Bakıya dəvət edib.

Azərbaycan səfirliyinə hücum 2023-cü il yanvarın 27-də baş verib. "Kalaşnikov" avtomatı ilə silahlanmış İran vətəndaşı Yasin Hüseynzadə mühafizə postundan keçərək səfirliyin əməkdaşlarına atəş açıb. Səfirliyin mühafizə rəisi öldürülüb, digər iki nəfər yaralanıb.

İran hakimiyyəti hücum edən şəxs barəsində hökmü hələ də rəsmən elan etməyib.

Maraqlıdır, Pezeşkian nəyi nəzərdə tutub? Onun həmin terrorçuya sərt cəza təyin olunmasına nəzarət və təmin etmək niyyətində olduğunu ehtimal etmək olarmı? Bu baş versə, İran-Azərbaycan münasibətlərinin yaxşılaşmasına ciddi təsir göstərəcəkmi?

Pressklub.az-ın suallarını tanınmış ekspertlər cavablandırıb.

Siyasi elmlər doktoru, QAFSAM-ın (Qafqaz Beynəlxalq Münasibətlər və Strateji Araşdırmalar Mərkəzi) sədr müavini Nazim Cəfərsoy bildirib ki, Pezeşkiyanın terrorçu ilə bağlı mesajı onun Azərbaycanla İran arasında razılaşmaya əməl etmək niyyətindən xəbər verir.

“İranın terrorçunu ciddi şəkildə mühakimə etmək vədini yerinə yetirməsi Azərbaycan və İran arasında münasibətlərin normallaşması baxımından böyük əhəmiyyət kəsb edir”, - o qeyd edib.

Lakin politoloq hesab edir ki, İranda bu prosesə mane olan nüfuzlu dairələr var.

“Diqqət yetirsəniz, kifayət qədər vaxt keçməsinə baxmayaraq, İran hakimiyyət dairələri hələ də terrorçunun məhkəməsini yekunlaşdırmayıb. Bu onu göstərir ki, İran-Azərbaycan münasibətlərində müxtəlif təxribatlar ehtimalı hələ də yüksəkdir”, - Cəfərsoy qeyd edib.

Öz növbəsində, Siyasi Menecment İnstitutunun rəhbəri Azər Qasımlı hesab edir ki, bu hadisə müəyyən müddətə unudulub və indiki mərhələdə ölkələr arasında münasibətlərə maneə olmayacaq.

“Bakıda bu məsələni o zaman xatırlaya bilər ki, ölkələr arasında münasibətlər yenidən pisləşsin. Bundan sonra ondan daxili auditoriya üçün təbliğat məqsədilə istifadə olunacaq”, - Qasımlı yekunlaşdırıb.

Rauf Orucov