Ermənistanın baş naziri Nikol Paşinyanın silahdaşlarına qarşı etimadsızlığı pik həddə çatıb, o, onların mülkləri ilə bağlı məlumatları yoxlamağı tapşırıb.

Pressklub.az Ermənistan KİV-nə istinadla xəbər verir ki, Baş nazir hüquq-mühafizə orqanlarının əməkdaşlarına kimin və nə qədər varlandığını anlamaq üçün "Vətəndaş Müqaviləsi" Partiyasının nümayəndələrinin, onların qohumlarının və onlarla əlaqəli şəxslərin, o cümlədən dostlarının əmlakı məsələsini öyrənməyi tapşırıb.

Qeyd olunur ki, Paşinyan komandasının bütün üzvləri ilə bağlı dosye toplamaq və onları daim qorxu içində saxlamaq qərarına gəlib.

İddia olunur ki, Ermənistanın baş prokuroru Anna Vardapetyan yaxın günlərdə parlamentin daha bir deputatının toxunulmazlığının ləğv edilməsi üçün yenidən parlamentə müraciət edəcək. Amma bu dəfə həmin şəxs hakim fraksiyadan olacaq.

“Fraksiya üzvləri artıq bu məlumatı fəal müzakirə edərək, kimin "qurban" seçildiyini və prokurorun kimin arxasınca gələcəyini anlamağa çalışırlar. İki namizəd var: keçmiş səhiyyə naziri Arsen Torosyan və müdafiə nazirinin keçmiş müavini Qaqik Melkonyan”, - mənbə bildirib.

Qeyd olunur ki, Torosyanın namizədliyi pandemiya dövründə səhiyyə naziri işlədiyi zaman sui-istifadəyə görə cinayət işi açıldığı üçün müzakirə edilir. Bundan başqa, “Vətəndaş Müqaviləsi” Partiyasının idarə heyətinə seçkilər zamanı saxtakarlıqları ifşa edən də məhz Torosyan olub.

Sabiq müdafiə nazirinin müavini, deputat Qaqik Melkonyanın cəzalandırılmasına səbəb isə onun "xəstələndiyini" bəhanə edərək, Müdafiə Nazirliyinin keçmiş rəhbəri, “Ermənistan” fraksiyasının rəhbəri, hərbi cinayətkar Seyran Ohanyanın toxunulmazlıqdan məhrum edilməsi ilə bağlı səsvermədə iştirak etməməsi ola bilər.