Münhen prokurorlugu Aksel Fişer və Eduard Lintneri korrupsiya və siyasətçilərə rüşvət verməkdə ittiham edib. İstintaq hesab edir ki, onlar Avropa Şurası Parlament Assambleyasında Azərbaycanın maraqlarını lobbiçilik etmək üçün pul alıblar.

Lintner Bundestaqda Bakının maraqlarını lobbi edən Alman-Azərbaycan Forumunun üzvü olub. Baş Prokurorluq Lintneri vasitəçilər vasitəsilə Bakıdan bir neçə milyon avro almaqda ittiham edir. Onun təsis etdiyi iki şirkət Azərbaycanda dövlət müəssisələri ilə müəyyən xidmətlərə görə aylıq ödənişləri nəzərdə tutan müqavilələr bağlayıb. Bu pulun Almaniya və Belçikada siyasətçilərə rüşvət vermək üçün də istifadə edildiyi iddia edilir.

Korrupsiya qalmaqalında şübhəli bilinənlərdən biri də Bundestaqın mərhum deputatı Karin Strenz olub. İstintaq Lintnerin Strenzə 150 ​​min avro ödədiyini üzə çıxarıb. O, öz növbəsində, 2015 və 2016-cı illərdə Avropa Şurasının Bakıya lazım olan qərarlar qəbul edəcəyinə zəmanət verib.

Fişer həmçinin Azərbaycan nümayəndəsi ilə razılaşıb ki, o, Avropa Şurasında həmin ölkənin “istiqaməti və maraqları əsasında” fəaliyyət göstərəcək. O, Azərbaycan haqqında müsbət fikirlər səsləndirib və məxfi sənədləri Bakı nümayəndələrinə verib və bunun üçün 22 min avro alıb.

Avropa Sabitlik Təşəbbüsü müəyyən edib ki, Lintner 2013-cü ildə Azərbaycanda keçiriləcək prezident seçkilərini müşahidə etmək üçün nümayəndə heyəti formalaşdırıb. Nümayəndə heyətinin üzvləri seçkiləri müsbət qiymətləndirib, lakin müstəqil müşahidəçilər isə çoxsaylı saxtakarlıqları sənədləşdiriblər. İki həftə sonra Lintner Azərbaycandan 61 min avro alıb.

Bunların İstintaqı dörd ildən çox davam edib. İstintaq zamanı 20 obyektdə, o cümlədən Bundestaq deputatlarının ofisində axtarış aparılıb. (Turan)