Azərbaycan Dövlət Akademik Milli Dram Teatrının aktyoru, Əməkdar artist Füzuli Hüseynovun sosial şəbəkə hesabında yazdığı son status müzakirələrə səbəb olub.

Belə ki, o, şəxsi hesabında “bəzi çaqqal səsləri gəlir “drama”dan... Çaqqalın işi ulamaqdır... Unutmayın!”, - deyə paylaşım edib.

Onun bu sözləri teatrın digər bir neçə aktyoru tərəfindən də bəyənilib, şərh edilib.

Məsələ ilə bağlı açıqlama verən F. Hüseynov iki cümlə deməklə kifayətlənib: “Teatrın bədii rəhbəri Azər Paşa Nemətovun vəfatından sonra sosial şəbəkələrdə anormal şeylər yazılır. Nədən söhbət getdiyini vaxtı çatanda açıqlayacağam”.



Aktyor Elçin Əfəndi isə həmkarının paylaşımına bu rəyi yazıb: “Çaqqalların səsinin kəsilməsi canavarların başını qaldırmasına qədərdir”.

F.Hüseynovun sözlərinə dəstək olan aktyorlardan biri Mətləb Abdullayevlə də əlaqə saxlasaq da, o bu barədə danışmaq istəməyib.

Teatrın Mətbuat xidməti də məsələni şərh etməyib.

Xatırladaq ki, Azər Paşa Nemətov aprelin 9-da 76 yaşında ürəktutmadan vəfat edib. Aprelin 10-u İkinci Fəxri xiyabanda dəfn edilib. Onun yerinə hələlik təyinat yoxdur. (Qafqazinfo)