Əziz həmvətənlər, Pressklub-un dəyərli oxucuları!

Noyabrın 8-i və 9-u Azərbaycanın təqvimində xüsusi yer tutur. Bir-birinin ardınca gələn bu iki bayramın hər birinin öz tarixi və dərin mənası var.

Noyabrın 8-də Zəfər Gününü – 44 günlük Vətən müharibəsinin dönüş nöqtəsinə çevrilmiş Şuşanın azad edildiyi günü qeyd edirik. Bu gün əsgər və zabitlərimizin igidliyini, xalqımızın dözümünü, birliyini və qələbə əzmini xatırlayırıq.

Bu tarixin özünəməxsus məqamı da var. Əvvəlcə Zəfər Gününün noyabrın 10-da qeyd olunması nəzərdə tutulmuşdu. Lakin Türkiyədə həmin gün Mustafa Kamal Atatürkün xatirəsinin yad edildiyi nəzərə alınaraq bayramın noyabrın 8-nə – Şuşanın azad edildiyi günə keçirilməsi qərara alındı. Bu qərarda təkcə tarixi yaddaş yaşamır, Azərbaycanın qardaş Türkiyəyə bəslədiyi xüsusi münasibəti də əks olunur.

Bu qələbə bir çoxumuz üçün yalnız tarixi hadisə deyil, həm də şəxsi duyğu və yaşantı oldu. O, bizə qürur, öz gücümüzə inam və nəhayət, ölkəmizin qarşıya qoyduğu məqsədə nail ola bilməsindən doğan daxili məmnunluq hissi bəxş etdi. Azərbaycan bütün dünyaya özünü yüksək səslə tanıtdı – artıq yalnız zəngin tarixi və mədəniyyəti olan ölkə kimi deyil, həm də qələbə qazanmış ölkə kimi.

Noyabrın 9-da isə Dövlət Bayrağı Gününü qeyd edirik. Üçrəngli bayrağımız sadəcə dövlət rəmzi deyil. O, tariximiz, dəyərlərimiz, müstəqilliyimiz və ölkəmizin gələcəyi qarşısında məsuliyyətimizdir.

Yəqin ki, bu iki bayramın yanaşı gəlməsi təsadüfi deyil. Qələbə öz gücümüzə inamımızı qaytardı, bayrağımız isə uğrunda bu qələbənin qazanıldığı dövləti təcəssüm etdirir.

Qələbəni bir günə qazanmaq olar. Dövləti isə hər gün qurmaq və möhkəmləndirmək lazımdır.

BAYRAMINIZ MÜBARƏK, ƏZİZ HƏMVƏTƏNLƏR!QOY BAYRAĞIMIZ AZAD AZƏRBAYCAN TORPAĞI ÜZƏRİNDƏ DAİM QÜRURLA DALĞALANSIN, ÖLKƏMİZDƏ SÜLH, RİFAH VƏ HƏMRƏYLİK HƏMİŞƏ HÖKM SÜRSÜN.