26 iyul 2026-cı ildə Füzuli Beynəlxalq Hava Limanında IV Aerokosmik Modelçilik Festivalı keçirildi. Azərbaycan tarixində ilk dəfə aerokosmik modelçilik festivalı beynəlxalq hava limanında təşkil olundu. İki gün sonra, 28 iyulda Bakıda “İnnovasiyalar Mərkəzi”ndə festivalın qalibləri mükafatlandırıldı.

Festival Azərbaycan Respublikasının Gənclər və İdman Nazirliyi, Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”, Milli Aviasiya Akademiyası və “Yeni Texnologiyaların İnkişafına Dəstək” İctimai Birliyinin birgə təşkilatçılığı ilə keçirilib.

Qarabağda yeni aerokosmik platforma

2021-ci ildə istifadəyə verilən Füzuli Beynəlxalq Hava Limanı Qarabağ regionunun ilk beynəlxalq hava limanıdır. Festivalın məhz burada keçirilməsi bölgədə aerokosmik sahənin və texniki yaradıcılığın inkişafı üçün yeni imkanlar açdı. Aviasiya infrastrukturunun gənc mühəndislərin yaradıcılığına xidmət etməsi tədbirə xüsusi rəmzi məna qazandırdı.

Festivalın fəxri qonağı Türkiyənin ilk astronavtı Alper Gezeravcı oldu. Onun iştirakı gənc iştirakçılar üçün ilhamverici məqama çevrildi.

Xarici universitetlərin böyük marağı

Festival xarici universitetlərin böyük marağına səbəb oldu. Yarışlarda aşağıdakı ali təhsil müəssisələrinin tələbələri öz layihələri ilə fəal iştirak etdilər:

Böyük Britaniyanın Imperial College London universiteti;

Fransanın Institut Polytechnique de Paris və Université Paris-Saclay universitetləri;

Türkiyənin Erciyes Universiteti;

Daşkənddəki Turin Politexnik Universiteti (Özbəkistan);

Ukraynanın “Xarkov Aviasiya İnstitutu” Milli Aerokosmik Universiteti.

Beynəlxalq qonaqlar arasında Özbəkistan Ali Təhsil, Elm və İnnovasiyalar Nazirliyinin koordinatoru, Nizami adına Daşkənd Dövlət Pedaqoji Universitetinin birinci prorektoru, Xarkov Aviasiya Universitetinin rektoru və birinci prorektoru, Ukraynanın Azərbaycandakı fövqəladə və səlahiyyətli səfiri və hərbi attaşesi var idi.

12 yarış növü, aviaşou və nümayişlər

Artıq dördüncü dəfə təşkil olunan festival iki mərhələdən ibarət olub. Yarışlar 12 növ üzrə keçirildi: “S-3-B Paraşüt”, “S-3-C Paraşüt”, “S-4-D Raketaplan”, “S-6-A Streamer”, “S-6-B Streamer”, “S-6-C Streamer”, “Peyk modelçiliyi (CubeSat)”, “Startap (Aerospace)”, FPV dron, təyyarə modelçiliyi, “Naqilsiz rabitə” və “Səmt müəyyənetmə”. “Naqilsiz rabitə” və “Səmt müəyyənetmə” 2026-cı ildə proqrama ilk dəfə daxil edildi.

Yarışlarla yanaşı aviaşou, kvadrokopter və təyyarə modellərinin nümayiş uçuşları da təşkil olundu. Qiymətləndirmədə uçuşun hündürlüyü və müddəti, enişin dəqiqliyi, modellərin texniki göstəriciləri və uçuşun reallığa uyğunluğu əsas meyar kimi götürüldü.

Qaliblər Bakıda mükafatlandırıldı

28 iyul 2026-cı ildə Bakıda “İnnovasiyalar Mərkəzi”ndə festivalın mükafatlandırma mərasimi keçirildi. Mərasimdə “İnnovasiyalar Mərkəzi”nin direktoru Vüsal Rüstəmov, Milli Məclisin deputatı Sadiq Qurbanov, gənclər və idman nazirinin müşaviri Ramil Cabbarov, Sumqayıt Dövlət Universitetinin rektoru Nurəli Yusifbəyli, Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri Rüfət Zamanov, Xarkov Aviasiya Universitetinin rektoru və birinci prorektoru, eləcə də dövlət qurumlarının və tərəfdaş təşkilatların nümayəndələri iştirak etdilər.

Tədbir Azərbaycanın ərazi bütövlüyü və suverenliyi uğrunda canlarından keçmiş şəhidlərin xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başladı. Daha sonra festivalın əsas məqamlarını əks etdirən videoçarx nümayiş olundu.

Bütün 12 yarış növü üzrə I, II və III yerlərin qaliblərinə medal, kubok və diplomlar təqdim edildi. Festivalda fəal iştirak edənlər sertifikatlarla təltif olundu.

Tərəfdaşlara təşəkkür

Festivalın təşkilinə və uğurla keçirilməsinə verdikləri dəstəyə görə Gənclər və İdman Nazirliyi, “İnnovasiyalar Mərkəzi”, Daxili İşlər Nazirliyi, Fövqəladə Hallar Nazirliyi, Füzuli Rayon İcra Hakimiyyəti, Qeyri-Hökumət Təşkilatlarına Dövlət Dəstəyi Agentliyi, Hava Nəqliyyatında Baş Gömrük İdarəsi, Hərbi Hava Qüvvələri, Azərbaycan Hava Yolları (AZAL), AZAD Systems, ASAN Viza, ASAN TV, ASELSAN Bakı, Hədəf Liseyi, IT Innovations Academy, AzST MMC və ORBITE MMC-nin nümayəndələrinə təşəkkürnamələr təqdim olundu.

Gələcəyin mühəndisləri üçün meydan

Festivalın əsas məqsədi ölkədə raket və peyk modelçiliyinin inkişafına töhfə vermək, gənclərdə innovativ düşüncəni təşviq etmək, sağlam həyat tərzini təbliğ etmək və texniki yaradıcılığın kütləviləşməsini dəstəkləməkdir. Keçirilən festivallarda iştirak üçün ölkənin müxtəlif bölgələrindən ümumilikdə 1500-ə yaxın müraciət daxil olub.

IV Aerokosmik Modelçilik Festivalı Azərbaycanda aerokosmik modelçilik, texniki yaradıcılıq və beynəlxalq əməkdaşlıq üçün geniş platformanın formalaşmaqda davam etdiyini bir daha göstərdi.