Yeni il yaxınlaşır, amma Rusiyanın Ukrayna infrastrukturuna şiddətli hava zərbələri səngimək bilmir. Ukrayna prezidenti Volodimir Zelenski Rusiyanın çox soyuq havada yüz minlərlə insanın işıqsız və istiliksiz qalmasına yol açan bu hava hücumunu "insana yaraşmayan" davranış adlandırıb: "Putin bilərəkdən hücum üçün Milad bayramını seçdi. Bundan qeyri-insani nə ola bilər? Ballistik raketlər daxil, 70-dən çox raket, yüzdən çox PUA atılıb".

Yanvarın 20-də Ağ evi tərk edəcək Co Bayden sözügedən hücumla bağlı Ukraynaya yeni dəstək və yardım sözü verib.

"Müdafiə Nazirliyinə tapşırmışam ki…"

"Bu dəhşətli hücumun məqsədi Ukrayna xalqını qışda istilik və elektrik enerjisindən məhrum etmək və enerji sisteminin güvənliyini təhlükəyə atmaqdır", - Baydenin sözləridir. ABŞ prezidenti əlavə edib ki, Ukrayna Rusiya təcavüzünə son qoyanadək ölkəsi və beynəlxalq ictimaiyyət bu ölkəni dəstəkləməlidir: "Müdafiə Nazirliyinə tapşırmışam ki, Ukraynaya silah tədarükünü fəal şəkildə davam etdirsin. Rusiya ordusundan müdafiə olunan Ukraynanın öz mövqelərini gücləndirməsi üçün ABŞ yenə dayanmadan çalışacaq".

Hava hücumu nəticəsində Dnepropetrovsk vilayətində bir nəfər ölüb, Xarkovda isə altı nəfər yaralanıb. Şəhərin mülki qeyri-yaşayış infrastrukturuna da ziyan dəyib. Xarkov, Dnepropetrovsk və Çerniqov zərbələrin əsas hədərlərinə çevrilib.

Zərbələrin Ukraynanın hərbi-sənaye kompleksini enerjiylə təchiz edən çox önəmli obyektlərə endirildiyini deyən Rusiya Müdafiə Nazirliyi bütün hədəflərin vurulduğunu bildirib.

Rusiya rəsmilərinin bilgisinə görə, Ukrayna ordusunun Kursk vilayətinin Liqov şəhərinə hücumu nəticəsində dörd nəfər ölüb, bir yaşayış evinə ziyan dəyib. Belqorod və Voronej vilayətləri də Ukrayna PUA-larının hücumuna məruz qalıb.

"Ukraynada silahlar sussun"

Böyük Britaniyanın baş naziri Kir Starmer Ukraynanın enerji infrastrukturuna davam edən hücumu qınayıb.

Roma Papası Fransisk bütün insanlara, xalqlara və millətlərə üz tutaraq, onları fikir ayrılıqlarını arxada qoymağa və silahları susdurmağa çağırıb: "Qoy günahsız əziyyət çəkən Ukraynada silahlar sussun".

Ukrayna əhalisinin çoxu pravoslav xristianlardır. Ancaq ard-arda ikinci ildir ki, ölkə Milad bayramını Qərb ölkələriylə birgə - dekabrın 25-də qeyd edir. Rusiyalılar, serblər və digər pravoslav xalqlar bayramı yanvarın 7-də keçirir.