ABŞ əvvəllər Almaniya tərəfindən alınmış və dəyəri 29,6 milyon dollar olan "Patriot" hava hücumundan müdafiə sistemləri üçün əlavə 10 ədəd MIM-104E GEM-T-ın Ukraynaya verilməsinə icazə verməyə hazırlaşır.

Bu barədə ABŞ Dövlət Departamentinin Konqresin saytında dərc olunmuş bildirişində elan olunub.

"Bu göndəriş ABŞ-nin təhlükəsizlik yardımı məqsədlərinə uyğundur. ABŞ hökuməti siyasi, hərbi, iqtisadi, insan hüquqları və silah nəzarəti mülahizələrini nəzərə alaraq bu köçürməyə icazə verməyə hazırdır", - sənəddə deyilir.

Bağlanılan müqavilələrə əsasən, üçüncü ölkələr tərəfindən ABŞ silahlarının təhvil verilməsi üçün Vaşinqtonun əvvəlcədən razılığı tələb olunur.

ABŞ Dövlət Departamenti qeyd edib ki, Ukrayna hava hücumundan müdafiə imkanlarını gücləndirmək üçün bu sistemləri əldə etməyə çalışır və artıq eyni tipli sursatlara malikdir.