Bazar ertəsi ABŞ diplomatik nümayəndəlikləri vasitəsilə bütün ölkələri İrana Yaxın Şərqdə gərginliyin onların maraqlarına uyğun olmadığını bildirməyə çağırıb. TURANın Vaşinqton müxbiri xəbər verir ki, prezident Co Bayden, dövlət katibi Antoni Blinken və başqaları İranın İsrailə hücumunun qarşısını almaq üçün həftə sonu Yaxın Şərqdəki müttəfiq və tərəfdaşlarına güclü diplomatik təzyiqlər ediblər.

Bu arada Rusiya Təhlükəsizlik Şurasının katibi Sergey Şoyqu HƏMAS liderinin öldürülməsinə cavab hazırlayan İran liderləri ilə danışıqlar aparmaq üçün bazar ertəsi Tehrana gəlib.

Dövlət Departamentinin sözçüsü Metyu Miller bazar ertəsi brifinqdə TURANın suallarını cavablandırarkən deyib: “Biz Rusiyanın gərginliyin azaldılmasında məhsuldar rol oynayacağını gözləmirik”. “Oktyabrın 7-dən bəri onların bu münaqişədə məhsuldar rol oynadığını görmədik. Onlar ortada yox idi və biz onların hər iki tərəfi gərginliyi azaltmaq üçün addımlar atmağa təşviq etmək üçün heç nə etmədiklərini gördük”.

Miller əlavə edib ki, Birləşmiş Ştatlar Şoyqunun səfərinin niyə indi baş verdiyini bilmir, lakin Rusiyanın Ukraynaya qarşı təcavüzünə dəstək axtarmağa davam etdiyi üçün bir ehtimal Moskvanın Tehranla münasibətlərini gücləndirmək ola bilər.

Putin hələ ki, Yaxın Şərqdə gərginliyin artmasına münasibət bildirməyib, lakin Kreml bu yaxınlarda Tehranda İsmayıl Haniyənin öldürülməsini pisləyib.

Bazar ertəsi Dövlət Departamentində çıxış edən dövlət katibi Blinken Yaxın Şərqdəki vəziyyəti “kritik an” adlandırıb. “Biz, demək olar ki, gecə-gündüz intensiv diplomatiya ilə məşğul oluruq, çox sadə mesajla: bütün tərəflər eskalasiyadan çəkinməlidir” deyib.

Qəzzada atəşkəsə nail olmaq vacibdir. Blinken vurğulayıb ki, bu, təkcə Qəzzanın özündə deyil, həm də münaqişənin yayıla biləcəyi digər ərazilərdə daha böyük sülh imkanlarını açacaq.