On beş - iyirmi il əvvəl bu şəxslərin söhbətini ölkənin televiziya məkanının iki məşhur simasının birinin digərindən müsahibəsi adlandırmaq olardı. Bu gün isə oxucuların diqqətinə təqdim etdiyimiz diasporumuzun iki dəyərli, tanınmış nümayəndəsinin mükaliməsidir. İsveçdə Azərbaycan Mədəniyyət Mərkəzinin rəhbərlərindən biri, SAMM TV-nin yaradıcısı, “Press Klub”un Skandinaviya bürosunun direktoru Rahim Sadıqbəyli ilə Moskvada yaşayan, üzün müddət biznes sahəsində çalışmış, hazırda “Press Klub”un Rusiya bürosunun rəhbəri, siyasi şərhçi Xəyal Tağıyev mühüm ictimai-siyasi proseslərdən və dünya azərbaycanlılarının aktual problemlərindən bəhs edirlər.

Rahim Sadıqbəyli: Xəyal, sən xeyli vaxtdır televiziyadan, mətbuatdan ayrılmışdın. Darıxmırdın ki, mətbuat üçün?

Xəyal Tağıyev: Əgər tamaşaçılar xatırlayırsa, mən uzun müddət ANS-də “Ötən həftə” analitik proqramının aparıcısı və müəllifi olmuşam. Eyni zamanda, ictimai-siyasi problemlərə dair verilişlərin, müxalifət və iqtidar nümayəndələri arasında debatların təşkilində iştirak etmişəm, “Əhatə dairəsi” proqramını aparmışam. Bu baxımdan ictimai-siyasi prosesləri həmişə diqqətlə izləmişəm. Bu, bir vərdişdir. Jurnalistika da elə bir sahədir ki, insan bir dəfə gəlir və ömürlük bu sahədə qalır. Nə olsun ki, ictimaiyyət qarşısına çıxmırdım, əslində prosesləri özüm üçün təhlil edirdim, bu ətrafda düşünürdüm. İndi yaxşı ki, belə imkanlar var. İndi mən old.pressklub.az saytı ilə əməkdaşlıq edirəm, yazıram. Qaldı darıxıb-darıxmamağıma, əslində dostlar-həmkarlar üçün təbii ki, darıxıram. O vaxtlar jurnalistikada demokratik, yaradıcı bir mühit var idi, həmin mühit üçün darıxıram. Və təbii ki, həmin mühiti yaradan insanlar var idi, onlar 1990-cı illərdə, 2000-ci illərin əvvəllərində müasir Azərbaycan jurnalistikasının səlnaməsini yazmışdılar.

Rahim Sadıqbəyli: Rusiyadakı həmvətənlərimizin sayı bütün Avropada yaşayan azərbaycalıların sayından çoxdur. Kifayət qədər zəngin insanlar da var. Niyə bu günə kimi bizim orada yerli ictimaiyyətə xitabən bir televiziyamız, mətbuat orqanımız yoxdur? Bu gün virtual aləm genişlənib. Dünənki antenalara, ötürücülərə də o qədər ehtiyac qalmayıb. İnternet hamısını əvəz edir. Bildiyim kimi, qonşularımız həmin imkanlardan məharətlə istifadə edirlər, Rusiyada söz sahibidirlər. Belə bir təşəbbüs bizim tərəmizdən də olubmu və ya olacaqmı?

Xəyal Tağıyev: Məsələnin üç aspekti var. Birincisi odur ki, indi biz internetin yaratdığı imkanlardan bəhrələnirik. Bax, bu saat səninlə internet vasitəsilə ünsiyyət qurmuşuq. Yəni Azərbaycana, azərbaycanlılara söz demək imkanlarımız genişdir. Düşünürəm ki, burada bir problem yoxdur. İstənilən şəxs Rusiyada, yaxud digər ölkələrdə yaşayan diaspor nümayəndələrinə müraciət edə və onların hər işə münasibətini öyrənə bilər. Məsələnin ikinci tərəfi digər ölkələrin yerli xalqlarına xitabən hansısa məlumatların ötürülməsindən ibarətdir. Rusiyada bu cür televiziyalar var. Doğru qeyd elədin ki, burada “Russia today” adlanan bir kanal var və o, dünyanın bütün ölkələrinə Rusiya ilə bağlı məlumatları yaymaqdadır. Həmin quruma məhz bizim qonşularımızın nümayəndəsi başçılıq edir. Azərbaycanda da bənzər bir televiziya var: CBC TV bu yöndə fəaliyyət göstərir, düşünürəm ki, kifayət qədər peşəkarcasına iş görür, amma bildiyimə görə, yayımı lokal xarakter daşıyır. Təbii ki, o, Rusiyanın federal məkanında yayımlansın deyə, dövlətlərarası razılaşma olmalıdır. Digər televiziyalar da ola bilər ki, Rusiyada yaşayan azərbaycanlılara xitabən mədəni proqramlar yaysın. Amma düşünürəm ki, indiki zəmanədə bu cür proqramlara böyük ehtiyac yoxdur, çünki Rusiyada yaşayan azərbaycanlıların həm də internet imkanları böyükdür, onlar internet vasitəsilə istənilən Azərbaycan kanalını izləyə bilərlər. Hətta səhv etmirəmsə, diaspora ilə bağlı ayrıca yayım da var. Amma çox istərdim ki, həmin yayım həm də tədris xarakteri daşısın, Azərbaycan dilini tədris edən proqramlar çoxluq təşkil etsin. Burada yaşayan azərbaycanlıların bir çoxunun övladı Rusiyada doğulub və onların Azərbaycan dilinə yiyələnmək imkanları məhduddur. Odur ki, tədris proqramlarının yaranması, tək televiziya yox, digər informasiya daşıyıcıları vasitəsilə yayılması vacibdir. Məsələnin ücüncü aspekti Rusiyada yerli kanallarda azərbaycanlıların təmsilçiliyi ilə bağlıdır: jurnalist kimi, şərhçi kimi, politoloq kimi, digər mütəxəssis kimi təmsilçiliyi. Bu da var, deməzdim ki, qonşularımız qədərdir, amma var. Fraqmentar çıxış edirlər, fikir söyləyirlər. Ayrı məsələdir ki, bəzən dəvət edənlər elə şərait yaradırlar ki, onlar öz sözlərini sonadək dürüst ifadə edə, bizim millətin mənafelərini istənilən şəkildə qoruya bilmirlər. Eyni zamanda, kommersiya imkanları da nəzərə alınmalıdır. Təmsilçiliyimizi təmin etmək üçün biz bunun üzərində işləməliyik. Beyin mərkəzi olmalıdır ki, azərbaycanlalırın hazırlanmasını, gənclərimizin, burada təhsil alanlarımızın proseslərə qoşulmasını təmin etsin. Əslində burada qeyri-adi bir şey yoxdur. Rusiyada təxminən 2 milyon azərbaycanlı yaşayır, onlar adlarına layiq təmsilçilik tapmalıdırlar. Bizim gözəl mədəniyyətimiz var, bütün sahələrdə müəyyən nailiyyətlərimiz var, onları həm yerli xalqın nümayəndələrinə çatdırmaq üçün, həm yerli problemlərlə bağlı müzakirələrə qoşulmaq üçün bizim mütəxəssislərə böyük ehtiyacımız var.  Bu ətrafda diaspora işləməlidir.

Rahim Sadıqbəyli: Yeri gəlmişkən, diasporla əlaqələrin necədir? Rusiyada azərbaycanlıların bir neçə diaspor təşkilatı var, sən onların üzvü deyilsən, amma əlaqələrin varmı?

Xəyal Tağıyev: Təxminən 10 il əvvəl bir diaspor təşkilatına müraciət etmişdim. Həmin təşkilatın funksioneri ilə söhbət etdim, planlarım olduğunu dedim, bilik və bacarığımdan istifadə etməklə müəyyən planların həyata keçirilməsini təklif etdim. Reaksiya olmadı. Məsələ yaddan çıxdı, aktuallığını itirdi. Ondan sonra əlaqəm olmayıb. Amma son zamanlar yeni yaranmış Rusiya Azərbaycanlıları İttifaqının nümayəndələri ilə görüşmüşəm, fikir mübadiləsi aparmışıq, bəlkə də əməkdaşlıq mümkün oldu.

Rahim Sadıqbəyli:  Hal-hazırda Rusiyada diasporun vəziyyəti necədir? Mən bir sitat gətirmək istəyirəm. Üzr istəyirəm ki, bunu burada deməliyəm. Daha çox mahnıları ilə populyar olan Azərbaycanın Rusiyadakı səfiri, xalq artisti Polad Bülbüloğlu bu yaxınlarda açıqlama verib ki, mən diasporla əlaqə saxlamıram və onlarla görüşmürəm. Diaspor bunu necə qiymətləndirdi? Sənin özünün də buna münasibətini bilmək istəyirəm.

Xəyal Tağıyev: Düzü, bilmirəm diaspor bunu necə qiymətləndirdi. Məsələyə qayıdarıq. Sən diasporun vəziyyətini soruşdun. Rusiyada hal-hazırda federal miqyasda iki təşkilatımız fəaliyyət göstərir. Biri də 2017-ci ilə qədər fəaliyyət göstərən Ümumrusiya Azərbaycanlılarının Konqresi idi, hazırda qapadılıb. Yeri gəlmişkən, 2001-ci ildə onun təsis qurultayında Rusiya prezidenti Vladimir Putin, bizim mərhum prezidentimiz Heydər Əliyev iştirak etmişdilər, xeyir-dua vermişdilər. Təxminən 16 il fəaliyyət göstərəndən sonra bu təşkilat qapadıldı. Səbəb gətirildi ki, Nizamnamə müddəalarında Rusiya qanunlarına uyğun gəlməyən məsələlər var. Nədən bu məqam 16 il keçəndən sonra ortaya çıxdı? Vaxtilə bu məsələ çox müzakirə olundu. Bəzi ehtimallara görə, Rusiyanın qərarı onunla bağlı idi ki, Azərbaycandan həmin təşkilatın işinə müdaxilələr var idi. Ehtimal edilirdi ki, kənardan müdaxilələrə çox həssas yanaşan Rusiya ona görə belə reaksiya verib. Doğru olub-olmadığını deyə bilmərəm. Azərbaycanlıların Milli-Mədəni Muxtariyyəti - “Azərros” adlanan təşkilatın işi barədə müfəssəl məlumata malik deyiləm. Hərçənd, bu yaxınlarda mətbuatda informasiya yayıldı ki, Moskvada metro stansiyalarından birinə Sovet İttifaqı qəhrəmanı Həzi Aslanovun adının verilməsi ilə bağlı onların təşəbbüsü olub. Çox gözəl təşəbbüsdür. Rusiya prezidentinin yanında Millətlərarası Münasibətlər Şurası var, bu təşkilat həmin Şuranın üzvüdür və prezidentin yanında keçirilən tədbirlərdə iştirak edir. Yeri gəlmişkən, həmin Şuranın Rəyasət Heyətində ermənilərin təşkilatının başçısı təmsil olunub, azərbaycanlıların yox. Mən düşündüm ki, niyə belədir? Görünür, azərbaycanlıların da təşkilatının sədri elə adam olmalıdır ki, onun nüfuzu heç kəsdə şübhə doğurmasın. Nəhayət, federal miqyasda fəaliyyət göstərən daha bir təşkilat  Rusiya Azərbaycanlıları İttifaqıdır. O, 9-10 ay bundan əvvəl təsis qurultayı keçirib, 50-dən çox bölgədə özəkləri var. Düşüncəmə görə, orada kifayət qədər sağlam qüvvələr toplaşıb. Ümumi vəziyyətimiz belədir.

Rahim Sadıqbəyli: Səfirin bəyanatı ilə bağlı sual qaldı...

Xəyal Tağıyev: Təbii ki, dediyiniz müsahibə mənim nəzərimdən qaçmayıb. Hörmətli səfirin fikirlərini şərh etmək istəməzdim, ilk əvvəl ona görə ki, istəməzdim səfirin nüfuzuna xələl gəlsin, çünki o, Azərbaycanın burada rəsmi nümayəndəsidir. İkincisi, ona görə ki, Polad Bülbüloğlunun Azərbaycan mədəniyyəti qarşısında böyük xidmətləri var. Amma çətin də olsa, bu suala cavab verəcəm. Ümumiyyətlə, istənilən səfirin öz millətinə bağlı təşkilatlarla və ya fərdlərlə görüşmək istəməməsi yanlış yanaşmadır. Bunun nədən qaynaqlandığını deyə bilmərəm. Azərbaycanda Prezident Administrasiyasının müvafiq şöbəsi var, Komitə var, nəhayət, XİN var, onlar araşdıra bilərlər ki, nədən münasibətlər bu vəziyyətə gəlib çıxıb. Vaxtilə hörmətli səfir bir müsahibə də vermişdi və orada belə fikir söyləmişdi ki, Rusiyada diaspor iddiasında olan müəyyən fərdlər və təşkilatlar var ki, Azərbaycanın mənafeyinə uyğun olmayan fəaliyyət göstərirlər, eyni zamanda yabançı qüvvələrlə hansısa əlaqədədirlər. Dəqiq demirəm, məzmununu ifadə edirəm. Sözün düzü, belə bir məlumat varsa, əvvəlcə elə diasporun özündə araşdırılmalıdır, müəyyən edilməlidir ki, bu hansı qüvvələrdir. Hər bir şəxs, Rusiya vətəndaşı ictimai birlik yarada bilər, amma bunu Azərbaycan diasporunun adına çıxmaq, zənn edirəm, düzgün deyil. Ona görə də diasporun özü müəyyənləşdirməlidir ki, bu hansı qüvvələrdir və fəaliyyətini gücləndirməklə həmin o qeyri-sağlam qüvvələri təcrid halına salmalıdır. Bununla yanaşı, nəzərə almaq lazımdır ki, Konqres qapadılandan sonra Azərbaycan diasporu ətrafında vəziyyət onsuz da gərgin idi. Bu zaman söylənilən hər sözün arxasında faktoloji baza olmalı idi. Faktoloji baza olmayanda münasibətlərin aydınlaşdırılması müxtəlif diaspor təşkilatları arasında, rəsmi orqanlarla,  bütövlükdə diaspor arasında əlavə gərginlik yarada bilər. Bu da ümumi işimizə, ümumi mənafeyimizə xələl gətirmiş olar. Ona görə bu cür məsələlərdə son dərəcədə ehtiyatlı olmaq, faktlara əsaslanmaq lazımdır. Səfirliklə diaspor arasında münasibətlər kiminsə kiməsə tabeçiliyi əsasında qurulmamalıdır. Çünki Rusiyanın qanunlarına uyğun fəaliyyət göstərən ictimai birlikdən söhbət gedirsə, bu, digər ölkənin səfirliyi ilə üfüqi münasibətlər əsasında formalaşdırılmalıdır.

Rahim Sadıqbəyli: Səfirliklərin fəaliyyət formalarından biri də diasporla əlaqələrdir və dediyin kimi, yəqin bu məsələyə Azərbaycanın müvafiq qurumları öz münasibətlərini bildirərlər. Bir məqamı aydınlaşdırmaq istəyirəm: O dediyin qrupların içinə hansısa ekstremist dini qurumlar da aiddirmi? Çünki Rusiyada belə qurumların da fəaliyyət göstərdiyi barədə məlumatlar dolaşır.

Xəyal Tağıyev: Məndə bununla bağlı dəqiq məlumat yoxdur. Ətrafda müxtəlif söhbətlər, şayiələr var. Bu məsələdə dəqiq araşdırma aparılmalıdır.

Rahim Sadıqbəyli: Səncə, dünyada olan Azərbaycan diasporları arasında münasibətlər necə qurulmalıdır ki, onlar strateji məqamlarda bir nöqtəyə vursunlar?

Xəyal Tağıyev: Geniş mövzudur, konseptual yanaşmaq lazımdır. Diaspor nədir? Diaspor yaratmaq, məsələn,  Rusiyada yaşayan azərbaycanlıları bir yerə gətirmək, təşkilatlandırmaqdır. Bu, nə üçün lazımdır? Milli-mədəni inkişaf, insan potensialının inkişafı üçün. Eləcə də bütün ölkələrdə öz mədəniyyətini layiqincə təmsil etmək, vətənlə yaşadığın ölkə arasında bir növ körpü olmaq üçün. Biz müxtəlif ölkələrdə yaşasaq da, hamımız vətənə bağlı insanlarıq. Bu bağlılıq nə ilə ifadə olunur?  Mədəniyyətlə, mətbəxlə, birlikdə bayramları qeyd etməklə. Bununla yanaşı, həm də yaşadığın ölkəyə inteqrasiya olmaq, həmin ölkənin ictimai-siyasi proseslərində, elmində iştirak etmək, ictimai kəsimlərdə təmsil olunmaq lazımdır. Biz bu əsaslar üzrə konfederasiyalar yarada bilərik. Niyə də yox? Məqsədlərimiz bir, dilimiz bir, dinimiz bir, vətənimiz bir.

Rahim Sadıqbəyli: Növbəti sualda sənin bir siyasi şərhçi kimi fikirlərini bilmək istəyirəm. Əziz qardaşım, bu günlərdə Rusiyada nə baş verir? Orada da bunu “islahatlar” adlandırırlar...

Xəyal Tağıyev: Rusiya prezidenti yanvarın 15-də Federal Məclis qarşısında çıxış etdi və faktiki olaraq Konstitusiya islahatlarını elan elədi. Üç məsələ bu islahatların məğzini təşkil edir. Birincisi – sosial paketdir. Prezident təklif edir ki, Rusiya Konstitusiyasında pensiyaların və minimal əməkhaqqının indeksasiyası təsbit olunsun, sosial təminatlar Konstitusiyada təsdiqini tapsın, eyni zamanda federal qanunla tənzimlənsin. İkinci məsələ hüquqi dəyişikliklərdən ibarətdir. Təklif olunur ki, Rusiya qanunları beynəlxalq qanunlardan üstün olsun və bu, Konstitusiyada təsbit edilsin.  Yəni tutalım, Rusiya məhkəməsi hansısa vətəndaşa qarşı qərar qəbul edərsə, həmin vətəndaş Avropa Məhkəməsinə müraciət ünvanlayarsa, Avropa Məhkəməsi də onun lehinə qərar çıxararsa, bu qərarın yerinə yetirilməsi Rusiyada mütləq deyil. Belə müddəalar Qərbi Avropa ölkələrində də var. Bununla Rusiya fövqəldövlət olduğunu nümayiş etdirmək istəyir. Göstərmək istəyir ki, öz daxilində işini istədiyi kimi, heç kəsi eşitmədən, yerli hüquq sistemində davam etdirə bilər. Üçüncü məsələ isə siyasi məsələdir, daxili siyasətə aiddir. Təklif olunur ki, baş nazirin təyin edilməsi prezidentin təklifi ilə Dumada həll olunsun. Beləliklə, prezidentin səlahiyyətlərinin bir qismi Dumaya verilir. Rusiyada 90-cı illərdən yaradılmış prezident yanında Dövlət Şurası var. Onun sədri prezident özüdür. Təklif olunur ki, həmin Şura haqqında müddəa Konstitusiyaya salınsın. Onun fəaliyyəti Dumada qəbul olunan federal qanunlarla tənzimlənsin. Bu da belə mülahizələrin yaranmasına imkan verdi ki, hakimiyyət yükünün prezidentdən alınıb, Dövlət Şurasına keçirilməsinə hazırlıq görülür, yəni Rusiyada super prezident hakimiyyətindən super Dövlət Şurası hakimiyyətinə keçid dövrü yaranır. Bu da belə ehtimallar doğurdu ki, gələcəkdə yeni siyasi konfiqurasiya yaradılacaq, 2024-cü ildə Vladimir Putin prezident olmayacaq, amma Dövlət Şurasının sədri kimi qalacaq. Prezidentin səlahiyyətləri azalacaq, onların böyük qismi Dövlət Şurasına ötürüləcək, bir qismi də Dumada olacaq. Yeri gəlmişkən, Medvedevin baş nazir postundan istefa verməsinə baxmayaraq, o, “Yedinaya Rossiya”nın sədridir və 2021-ci il seçkilərində, təbii ki, Dumada “Yedinaya Rossiya”nın çoxluğu təmin ediləcək.

Rahim Sadıqbəyli: Amma sonradan prezident Putin bir bəyanatla çıxış etdi ki, o, hakimiyyətdə ikitirəliyin yaradılmasının əleyhinədir, imkan verməyəcək ki, prezidentin səlahiyyətləri çox azalsın.

Xəyal Tağıyev:  Bəli, elə bu da məsələyə yeni intriqa gətirdi. İndi çox adam fikirləşir ki, əslində Putin nə etmək istəyir və nəyə görə bu islahatlara belə tez gedir? Çünki 2024-cü il prezident seçkilərinə qədər hələ vaxt var. Amma mənə elə gəlir, indi Dövlət Dumasına seçkilərə hazırlaşır hakimiyyət. 2021-ci ildə Dumada “Yedinaya Rossiya” çoxluq təşkil edəcək. Sonra isə vəziyyət elə ola bilər ki, 2024-dən əvvəlki illərdə, lap elə 22-23-cü illərdə vaxtından əvvəl prezident seçkiləri elan edilə bilər. Hər şey ola bilər. Baş nazir-prezident, Putin-Medvedev yerdəyişməsini xatırlayırsınız. Hazırda Medvedev Təhlükəsizlik Şurasının sədr müavini təklif olunub, baxmayaraq ki, belə vəzifə yox idi. Təklif olunur ki, Dumanın qərarı ilə həmin vəzifə təsis olunsun və tam əminəm ki, olunacaq.

Rahim Sadıqbəyli: Belə məlim olur ki, Rusiyada yeni “dərin dövlət”, əbədi hakimiyyət yaratmaq düşüncələri var.

Xəyal Tağıyev: Rahim, dünyada əbədi heç bir şey yoxdur. Siyasilər hakimiyyət məsələsini həll edirlər və burada qeyri-adi bir şey yoxdur, hər halda keçmiş SSRİ məkanında normal sayıla bilər. Vaxtında Qazaxıstanda belə islahatlar keçirildi.

Rahim Sadıqbəyli: Gedək Azərbaycana!

Xəyal Tağıyev: Gedək Azərbaycana!

Rahim Sadıqbəyli: Azərbaycanda da islahatlar gedir. Parlament seçkiləri olacaq. Heç gözləmədiyimiz adamlar istefaya göndərilib, yeni kadrlar gəlib, prezident Əliyev dəfələrlə islahatlar yolunu tutduğunu deyib, parlament özünü buraxıb və təəccüblü haldır ki, özü-özünü buraxan parlamentin nümayəndələri yenidən seçilmək iddiasındadırlar, yenidən qoşulublar mübarizəyə. Ümymiyyətlə, Azərbaycan Rusiyadan necə görünür?

Xəyal Tağıyev: Gözəl görünür. Burada mənim dostlarım var idi, ruslar. Bakıya getmək istəyirdilər. Mənimlə məsləhətləşirdilər: gedək, ya getməyək? Dedim, mütləq gedin. Bəzi məsləhətlər də verdim. Getdilər, çox razı qayıtdılar, vuruldular Bakıya və hər il getmək həvəsindədirlər. Bakı həddən artıq gözəl, bizim böyüdüyümüz, sevdiyimiz şəhərdir. Qaldı sənin siyasətlə bağlı sualına, birmənalı şəkildə demək istəyirəm ki, Azərbaycanda islahatlar gedir. Kimin şübhəsi varsa, islahatlarla bağlı nəzəriyyələri açsın və görsün ki, islahatlar məhz elə kadr dəyişikliyindən başlayır. Necə ola bilər ki, sən eyni kadrlarla yeni siyasət yeridəsən? Bu, mümkün deyil. Kadrların dəyişdirilməsi islahatların başlanğıcıdır. Parlamentin buraxılması da hakimiyyətin çox mühüm qanunverici qolunun islahatı deməkdir. Ona görə də hazırkı seçkilərin necə keçiriləcəyi və parlamentdə kimlərin təmsil olunacağı çox vacibdir. Qaldı kimlərinsə o parlamentdə olub, “özünü buraxıb”, sonra yenidən namizədliyini verməsinə, formal olaraq hər kəsin buna hüququ var. Bu, məsələnin emosional tərəfidir ki, soruşasan: necə ola bilər, bunlar özlərini buraxdılar, amma yenidən parlamentə gedirlər? Bəlkə çoxluğun yedəyində gedib, amma hesab edir ki, yaxşı işləyib? Vacibdir ki, parlamentə kimlərin keçəcəyinə baxasan. Yəqin ki, mənim düşüncələrim Azərbaycanda bir çoxlarının gözləntiləri ilə üst-üstə düşər, mən şəxsən istərdim ki, Azərbaycan parlamenti müzakirələr, mübahisələr, yeni ideyalar, tapıntılar yeri olsun. Yəni siyasi-ictimai mənada deyirəm. Maraqlı olardı yeni parlamentə baxmaq. Mən xatırlamıram, bəlkə sən xatırlayarsan, hansısa keçmiş sovet ölkəsində parlament özü-özünü buraxıb?

Rahim Sadıqbəyli: Xatırlamıram.

Xəyal Tağıyev: Mən də. Hər halda gözləyək, baxaq. Az qalıb. Əfsuslar ki, bir qisim siyasi qüvvələr həmin seçkilərdə iştirak eləmək istəmədi. Düşünürəm ki, düzgün qərar deyil. İstənilən halda, bütün palitranın parlamentdə təmsil olunması əslində çox vacibdir. Belə imkanlar var, yoxdur, bu, məsələnin ayrı tərəfidir, çünki əslində insanları səfərbər eləmək, öz səslərini müdafiəyə sövq etmək də bir işdir, siyasətdir.

Rahim Sadıqbəyli: Suallarım bitdi. Əziz tamaşaçılarıma və oxucularıma bildirmək istəyirəm ki, Xəyal Tağıyev mənim 25 ildən də artıq dostumdur. Azərbaycanın məşhur teleaparıcılarından, siyasi şərhçilərindən biri Xəyal Tağıyevlə mən sizi uzun illərdən sonra görüşdürdüm. İnanıram ki, biz onun maraqlı fikirlərini gələcəkdə də dinləyəcəyik, görüşəcəyik. Bu gün belə müstəqil insanların fikirlərinə doğrudan da böyük ehtiyac var.