Rusiya Təhlükəsizlik Şurasının katibi Sergey Şoyqu bəyan edib ki, Bakıya işgüzar səfəri zamanı Qərbin Cənubi Qafqazda təhlükəsizliyin qurulması prosesinə müdaxilə cəhdləri müzakirə olunub. Bu barədə TASS xəbər verir.

Şoyqu Azərbaycan Təhlükəsizlik Şurasının sədri Ramil Usubov və Prezident İlham Əliyevlə danışıqlar aparıb.

“Bir çox məsələlər müzakirə olundu. Bu, ilk növbədə, Cənubi Qafqazda təhlükəsizlik məsələsidir. Bu, artıq 10-cu variantı İrəvana təqdim edilən Ermənistanla sülh sazişidir. Təbii ki, bu, Qərbin bu prosesə çox fəal müdaxilə cəhdləridir” - Şoyqu jurnalistlərə bildirib. – “Və təbii ki, İlham Əliyevin “3+3” formatında (Azərbaycan+Ermənistan+Gürcüstan+Rusiya+Türkiyə+İran) danışıqlar ideyasıdır. Biz bu ideyanı dəstəkləyirik və mövzunu müzakirə etdik”.

Şoyqunun sözlərinə görə, bu format təkcə Ermənistan-Azərbaycan nizamlanmasında deyil, həm də bütövlükdə Cənubi Qafqazda vəziyyətin sabitləşdirilməsində istifadə edilməlidir.

Göründüyü kimi, müzakirə olunan bütün mövzular regional məsələlərin Qərbin iştirakı olmadan həllinə yönəlib. Bakıdakı müzakirələrin məzmunu Şoyqunun niyə Ermənistana getmədiyi və Ermənistan-Azərbaycan nizamlanmasını İrəvanda müzakirə etmədiyi sualına cavab verir. Çünki İrəvan bütün məsələləri Rusiya ilə deyil, Qərblə həll etməyə üstünlük verirlər.

Şoyqunun jurnalistlər qarşısında açıq şəkildə səsləndirdiyi məsələlər Azərbaycanın maraqlarına nə dərəcədə uyğundur? Doğrudanmı Cənubi Qafqaz dövlətlərinə regionda təhlükəsizliyin qurulması prosesinə Qərbdən çox Rusiyanın müdaxilə etməsi lazımdır? Üstəlik, rayonun hər üç xalqının belə təcrübəsi var və bu təcrübəni müsbət adlandırmaq olmaz. Rəsmi Bakının Şoyqunun və onu Azərbaycana göndərən şəxsin istəklərini qulaqardına vuracağına ümid etməyə dəyərmi? Yoxsa Azərbaycan rəhbərliyinin bu məsələdə Kremlin göstərişinə əməl etməyə razı olduğunu düşünməliyik?

Bununla bağlı Pressklub.az-a açıqlama verən siyasi şərhçi, hüquqşünas, ictimai xadim Fuad Ağayev ilk növbədə qeyd edib ki, Şoyqu artıq hətta müdafiə naziri də deyil.

“Rusiya Təhlükəsizlik Şurasının katibi kimi isə onun Rusiya hakimiyyətində o qədər də ciddi çəkisi yoxdur.

Onun Tehrana səfəri həqiqətən də region üçün böyük əhəmiyyət kəsb edir. Çünki səfər İrana hava hücumundan və raketdən müdafiə sistemlərinin tədarükü ilə bağlı idi. Amma bu başqa məsələdir.

Azərbaycana gəlincə, burada tamamilə fərqli mövzular - ikitərəfli münasibətlərin inkişafı, hökumətlərarası komissiyanın fəaliyyəti, regional təhlükəsizlik, Şimal-Cənub layihəsinin həyata keçirilməsi müzakirə olunub. Regional təhlükəsizlik məsələləri arasında Azərbaycanla Ermənistan arasında münasibətlər, eləcə də “3+3” formatının həyata keçirilməsi ilə bağlı məsələ də olub. Mən, əlbəttə, tərəflərin Azərbaycan və Ermənistan arasında sülh sazişi mövzusunu müzakirə edilməsinə nə qədər vaxt ayırdıqlarını bilmirəm. Amma fikrimcə, o qədər də çox vaxt ayırmayıblar. Şoyqunun jurnalistlərlə söhbəti zamanı sülh müqaviləsi layihəsinin 10-cu variantının İrəvana təqdim edildiyini deməsi və Qərbin bu prosesə aktiv müdaxilə cəhdlərini qeyd etməsi heç nə demək deyil”, - müşahidəçi hesab edir.

Onun sözlərinə görə, bu, Azərbaycan rəhbərliyinin qarşısında ona hansısa formada reaksiya vermək və sülh sazişinin Qərb dövlətlərinin vasitəçiliyi ilə razılaşdırılması cəhdlərinin qarşısını almaq öhdəliyi qoymur.

“Əminəm ki, Azərbaycan rəhbərliyi bundan sonra da balanslaşdırılmış siyasi xəttə sadiq qalacaq. Bakı təbii ki, Rusiyanın, eləcə də Avropa Birliyi və ABŞ-ın köməyindən imtina etməyəcək.

Digər tərəfdən, təbii ki, Rusiyanın sülh sazişinin bağlanmasına kömək etmək təklifini kobud şəkildə rədd etməyə ehtiyac yoxdur. İndi vəziyyət ondan ibarətdir ki, Cənubi Qafqazda Rusiyanın Azərbaycana daha çox ehtiyacı var, nəinki Azərbaycanın Rusiyaya. Və təbii ki, Bakı bu və bir çox başqa məsələlərdə Kremlin göstərişlərini yerinə yetirməyəcək. O, həm Qərb ölkələri, həm də Moskva ilə əməkdaşlığı davam etdirəcək. Odur ki, Şoyqunun jurnalistlərin suallarına verdiyi cavabların əhəmiyyətini şişirtməyək”, - deyə F.Ağayev yekunlaşdırıb.

Rauf Orucov