"Əvvəl onu tamaşa kimi oynamışam. Ramiz Əzizbəyli ilə film çəkiləndə elə qəşəng aktyor heyəti seçdi, uğurlu, baxımlı film oldu. Tamaşa da eyni formada baxımlı idi".

Bu sözləri Xalq artisti Valeh Kərimov "ATV səhər" verilişinə müsahibəsində deyib.

Aktyor illər əvvəl çəkildiyi və Azərbaycan tamaşaçısı tərəfindən sevə-sevə izlənilən "Bəxt üzüyü" filmindən söz açıb.

Sənətkar bildirib ki, heç zaman sözügedən ekran əsərini izləməyib:

"Tamaşanı götürüb filmə köçürtmək kino yaradıcılığından uzaqdır. Afaq Bəşirqızı ilə məni tamaşada artıq qəbul etmişdilər. Başqa aktyorları da baş rola çəkə bilərdilər, amma biz artıq tamaşada sevilmişdik. Filmə heç baxmamışam.

Özümə niyə baxım? Gündə 1 dəfə saçımı darayanda güzgüyə baxıram. Başqalarına baxıram. Oynadığım obrazdan ləzzət ala bilmərəm. Hamı məndən soruşur ki, filmdə açarı niyə götürmədin?".
Qeyd edək ki, 79 yaşlı Valeh Kərimov aylar əvvəl Mingəçevir Dövlət Dram Teatrında quruluşçu rejissor kimi işə başlayıb.