Sabah axşamdan başlayaraq hava şəraiti kəskin dəyişəcək, ölkə ərazisində küləklə müşayiət olunan yağışlı və qarlı hava müşahidə ediləcək. 

Pressklub.az xəbər verir ki, bunu Milli Hidrometeorologiya Xidmətinin rəisi Umayra Tağıyeva bildirib.

Onun sözlərinə görə, hava şəraitinin yağıntılı olacağı, bəzi yerlərdə yağışın tədricən qara keçəcəyi gözlənilir. Qarlı proses respublikanın əksər bölgələrini əhatə edəcək. Hətta Böyük Qafqazın bəzi ərazilərində, dağlıq və dağətəyi zonalarda qarın intensiv olacağı proqnozlaşdırılır.

Fevralın 23-ü axşamdan başlayaraq Bakıda və Abşeron yarımadasında yağış yağacağı gözlənilir. Gecə saatlarından etibarən və fevralın 24-ü günün birinci yarısında yarımadanın bəzi yerlərində sulu qar yağacağı ehtimal edilir: “Proqnoz qısamüddətlidir. Fevralın 24-ü axşam saatlarında ölkə ərazisində, o cümlədən Bakıda və Abşeron yarımadasında yağıntılar kəsiləcək”.