Bakının Xətai rayonu, Əhmədli qəsəbəsindəki supermarketlərin birinin qarşısında inkassator maşınına silahlı basqın olub.

Hücum edənlər 3 nəfəri güllələyərək qaçıblar. Nəticədə 2 nəfər xəsarət alıb, bir nəfər - Həsənov Rüfət Rahib oğlu isə dünyasını dəyişib.

Baş Prokurorluq Xətai rayonunda yerləşən supermarketdə baş verən atışma ilə bağlı məlumat yayıb.

Bildirilib ki, Xətai rayonu ərazisində yerləşən supermarketlərdən birində baş vermiş silahlı insidentlə bağlı hazırda Baş Prokurorluğun İstintaq idarəsi, Kriminalistika şöbəsi və Xətai rayon prokurorluğunun əməkdaşları hadisə yerindədirlər. Qeyd olunan faktla bağlı prokurorluqda araşdırma aparılır. İctimaiyyətə əlavə məlumatın verilməsi təmin ediləcək.