Ağ Ev ABŞ Konqresinə 2024-cü maliyyə ilinin müdafiə büdcəsi layihəsini təqdim edib. Layihədə sülh dövrü üçün rekord məbləğdə - 886 milyard dollar xərc nəzərdə tutulur.

Pressklub.az-ın məlumatına görə, bu barədə Reuters xəbər yayıb.

Layihə Pentaqonun ehtiyacları üçün 842 milyard dollar, Federal Təhqiqatlar Bürosu, Energetika Nazirliyi və digər qurumlara müdafiə ilə bağlı proqramlar üçün 44 milyard dollar ayırır.

Ağ Evin Konqresdən təsdiq etməsini xahiş etdiyi 2024-cü il üçün ümumi müdafiə xərcləri keçən ilkindən 28 milyard dollar çoxdur.

İlk dəfə olaraq ABŞ-ın müdafiə büdcəsi layihəsində adətən təyyarə və gəmilər üçün bağlanan çoxillik müqavilələr çərçivəsində raket və digər döyüş sursatlarının alınması nəzərdə tutulur. Mənbə qeyd edir ki, bu, çox güman ki, Çinlə potensial hərbi münaqişəyə hazırlıqla bağlıdır.

Layihə həm də atmosferin yuxarı təbəqələrinə buraxılan və ən qabaqcıl radar sistemlərini belə keçə bilən hipersəs raketləri kimi yeni silahların hazırlanmasına həsr olunmuş 145 milyard dollarlıq tədqiqat büdcəsinə malikdir.