Ukrayna Prezidenti Volodimir Zelenski daha əvvəl məhrum edildiyi "Ağ qartal" ordenini Polşa Prezidenti Karol Navrotskiyə göndərib.

Bu barədə onun "Telegram"dakı mesajında deyilir.

O, həmçinin paylaşıma poçt şöbəsindən çəkilmiş fotoşəkilləri də əlavə edib.

"Biz hesab edirdik ki, 2023-cü ildə "Ağ qartal" ordeni məhz Ukrayna xalqına və ordumuza ünvanlanıb. O vaxt belə deyilirdi", - Zelenski yazıb.

O qeyd edib ki, Polşanın ali etimadının rəmzi əvvəllər II Yekaterina, Benito Mussolini və Gerhard Şröder də daxil olmaqla, tarixi şəxsiyyətlərdə qalıb.

Bununla yanaşı, Ukrayna Prezidenti vurğulayıb ki, Kiyev Rusiya ilə qarşıdurmada dəstək və əməkdaşlığa görə Polşa xalqına minnətdardır və Varşava ilə gələcək qarşılıqlı fəaliyyətə ümid edir.

Ukrayna Prezidenti Ofisinin rəhbəri Kirill Budanov Polşa Prezidenti Karol Navrotskinin tarixi mübahisə fonunda Ukrayna lideri Volodimir Zelenskini Polşanın ən ali ordenlərindən birindən məhrum etməsindən sonra Polşa dövlət mükafatından imtina etdiyini bildirib.

Varşavanın qərarına səbəb Zelenskinin bölmələrdən birinin adını dəyişdirərək ona Polşada polyakların kütləvi qətllərində ittiham olunan İkinci Dünya müharibəsi dövrünün ukraynalı üsyançılarının adını verməsi olub.

Buna cavab olaraq K.Budanov ötən il aldığı Polşa Respublikasının "Xidmətlərə görə" ordeninin Qızıl Zabit xaçından imtina etdiyini bildirib və Polşa tərəfinin qərarını Rusiya üçün "hədiyyə" adlandırıb.

"Xalqlarımızın həm qəhrəmanlıq, həm də faciəvi səhifələri özündə birləşdirən ortaq bir tarixi var. Ancaq bu, siyasi spekulyasiyaların yox, dərindən anlamanın mövzusu olmalıdır", - o, sosial şəbəkədə yazıb.

Polşa Prezidenti iyunun 19-da Zelenskini Polşanın ən ali dövlət mükafatı - "Ağ Qartal" ordenindən məhrum etmək qərarına gəlib. Buna səbəb Zelenskinin Ukrayna Silahlı Qüvvələrinin bölmələrindən birinə "UPA qəhrəmanları" adının verilməsi haqqında fərmanı olub.

Daha əvvəl Ukraynanın xarici işlər naziri Andrey Sibiqa Polşa Prezidentinin qərarını "strateji səhv" adlandırıb. Polşanın Baş naziri Donald Tusk isə tərəfləri təmkinli olmağa çağırıb. K.Navrotskinin qərarı ilə əlaqədar olaraq, A.Sibiqa və Ukraynanın bu ölkədəki səfiri Vasili Bodnar Polşanın dövlət mükafatlarından imtina ediblər.