Ukraynaya məxsus pilotsuz uçuş aparatlarının (PUA) zərbələri nəticəsində zədələnmiş "Moskva" neft emalı zavodu (NEZ) ən azı altı ay fəaliyyət göstərməyəcək.

Bu barədə "Reuters" mənbələrə istinadən məlumat yayıb.

Məlumata görə, Rusiyanın Moskva vilayətinin ən böyük yanacaq tədarükçüsü olan zavod iyunda iki PUA hücumundan sonra ciddi zədələnib ki, bu da onun fəaliyyətinin dayandırılmasına səbəb olub.

"Təmirə ən azı yarım il lazım olacaq", - məlumatda qeyd olunub.

Agentlik vurğulayır ki, müəssisənin fəaliyyətinin dayanması Rusiyanın yanacaq çatışmazlığının aradan qaldırılması istiqamətində səylərini çətinləşdirə bilər.

Son məlumatlara görə, 2024-cü ildə "Moskva" NEZ-də 11,6 milyon ton neft emal edilib, 2,9 milyon ton benzin və 3,2 milyon ton dizel yanacağı istehsal olunub.