Avropa müşahidəçilər missiyasının “binokl diplomatiyası” qəbuledilməzdir. Bu barədə bazar ertəsi prezident İlham Əliyev Belçika Krallığının yeni səfiri Julyen de Freponun etimadnaməsini qəbul edərkən bildirib.

Əliyevin sözlərinə görə, bu, Azərbaycan-Avropa İttifaqı münasibətlərində etimadsızlıq yaradır.

“Avropa müşahidəçilər missiyasının müddətinin bizim razılığımız olmadan, hətta bizimlə məsləhətləşmədən uzadılmasına nə ehtiyac var idi?! – Əliyev deyib.

“Missiya üzvlərinin davranışı, necə deyərlər, “binokl diplomatiyası” heç cür qəbuledilməz və hər hansı bir normal siyasi mədəniyyət standartlarından kənar idi, - o hesab edir.

Sonra o, Yerevanın mövqeyini tənqid edərək Ermənistanın sülh sazişinin razılaşdırılmış müddəalarının imzalanması ilə bağlı təklifini reallıqdan kənar adlandırıb.

Onun sözlərinə görə, sülh müqaviləsinin bütün bəndləri eyni dəyərə malikdir, birini digərindən ayırmaq olmaz.

Dövlət başçısı Yerevanın razılaşdırılmış bəndləri imzalamaq və qalanını sonraya saxlamaq barədə təklifini "qəribə və qeyri-real" adlandırıb.